برخه -څانګه : accidents, news, politics, security, social
د خپرولو وخت : یکشنبه, 22 نوامبر , 2026 لنډ لینک :
د حقاني شبکې لوړپوړي غړي انس حقاني له یوه امریکايي یوټیوبر سره په مرکه کې ویلي، چې د افغانستان په شل کلنه جګړه کې نږدې یو میلیون کسان وژل شوي دي. د هغه دا څرګندونې یو ځل بیا د انساني ناورینونو په تړاو د طالبانو د رول او مسوولیت پوښتنې راپورته کوي.
انس حقاني، د حقاني شبکې له مهمو غړو او د سراجالدین حقاني ورور، په تازه څرګندونو کې ویلي، چې د افغانستان په شل کلنه جګړه کې نږدې یو میلیون کسان وژل شوي دي. دا جګړه د افغانستان د معاصر تاریخ له خونړیو جګړو ګڼل کېږي، او ګڼ شنونکي طالبان د جګړې له اصلي ښکېلو لورو بولي.
انس حقاني له یوه امریکايي یوټیوبر سره په مرکه کې د جګړې د پراخو انساني تلفاتو په اړه خبرې کړې او ویلي یې دي، چې څلور وروڼه یې هم په دې جګړه کې وژل شوي دي.
دا څرګندونې داسې مهال کېږي، چې په افغانستان کې د ملکي وګړو د پام وړ مرګژوبله د طالبانو په ځانمرګو بریدونو، د ماینونو په چاودنو او وسلهوالو بریدونو کې اوښتې ده. د جګړې په کلونو کې د دې ډلې بریدونو جوماتونه، ښوونځي، روغتونونه او ورزشي میدانونه هم په نښه کړي، چې له امله یې زرګونه بېګناه کسان وژل شوي دي.
د حقاني شبکه، چې د طالبانو یوه مهمه برخه بلل کېږي، د ګڼو خونړیو بریدونو مسوولیت منلی دی. د انس حقاني څرګندونو یو ځل بیا د انساني ناورینونو په رامنځته کېدو کې د دې شبکې او طالبانو مسوولیتونو ته پام اړولی دی.
د افغانستان د جګړې پر مهال بهرني ځواکونه او د پخواني حکومت سرتېري هم د ملکي وګړو په وژلو تورن شوي دي؛ خو څارونکي ټینګار کوي، چې دا موضوع د مرګونو بریدونو په تنظیمولو کې د طالبانو مسوولیت نه شي کمولای. اوس پوښتنه دا ده، چې ایا د طالبانو مشران به یوازې د جګړې د تلفاتو یادونه کوي، که د ملکي وګړو په وژلو کې به د خپل رول په اړه هم ځواب وايي؟