د بریتانیا ځانګړي استازي ریچارډ لېنډسي د خوارځواکۍ پر ضد د ملګرو ملتونو له درېیو مهمو بنسټونو سره د ګډ پروګرام د دویم پړاو د پیل خبر ورکړ او د مخنیوي پر اقداماتو یې ټینګار وکړ.
د افغانستان لپاره د بریتانیا ځانګړي استازي ریچارډ لېنډسي په دې هېواد کې د خوارځواکۍ پر ضد د ګډ پروګرام د دویم پړاو د پیل خبر ورکړ. دغه پروګرام د ملګرو ملتونو له درېیو مهمو بنسټونو سره په همکارۍ پلې کېږي. لېنډسي د ماشومانو د ژوند ژغورلو لپاره د مخنیوي پر وختي اقداماتو ټینګار وکړ.
دا پروګرام د ملګرو ملتونو د ماشومانو صندوق (یونیسف)، د خوړو نړیوال پروګرام او د خوړو او کرنې سازمان په همکارۍ عملي کېږي. د لېنډسي په وینا، د دې نوښت موخه د زیانمنو کورنیو د تغذیې ملاتړ پیاوړی کول او د خوارځواکۍ د احتمالي پېښو ژر پېژندل دي.
لېنډسي د پروګرام د لومړي پړاو لاسته راوړنو ته په اشارې وویل، شاوخوا ۵۲۰ زره میندو او پالونکو د تغذیې په اړه له مسلکي مشورو ګټه اخیستې ده. نږدې ۴۰ زره ماشومانو د ویټامینونو او منرالونو لرونکي د پیاوړتیا پوډرونه ترلاسه کړي او تر ۵۵ زرو ډېر کسان له نغدي مرستو برخمن شوي دي.
لېنډسي وویل، د پروګرام پلي کېدو د کورنیو پر معیشت مثبت اغېز کړی او په تر پوښښ لاندې کورنیو کې یې د خوړو ناامني ۲۵ سلنه راکمه کړې ده. هغه زیاته کړه چې د دې پروګرام دوام په افغانستان کې د لوږې د بحران پر وړاندې د پیاوړي ډال په توګه کار کولای شي.