ملګرو ملتونو د افغانستان اړمنو خلکو ته د بشري ناورین د مخنیوي لپاره ۱۸ میلیونه ډالره ځانګړي کړي دي. له نورو مرستو سره یوځای، افغانستان ته د ځانګړو شویو مرستو ټولیزه اندازه ۴۸ میلیونه ډالرو ته رسېږي.
ملګرو ملتونو د ژمي له رارسېدو سره د بشري ناورین د مخنیوي لپاره ۱۸ میلیونه ډالره ځانګړي کړي، څو د افغانستان له شاوخوا ۸۲۴ زره زیانمنو وګړو سره مرسته وشي.
دا بودجه د ملګرو ملتونو د سرمنشي مرستیال او د بشري مرستو د همغږۍ مسوول ټام فلچر تصویب کړې ده. موخه یې له هغو کورنیو سره مرسته ده چې له سختې بېوزلۍ، لوږې او ستونزمنو ژوندیو شرایطو سره مخ دي.
ټاکل شوې دغه پیسې د خوراکي توکو برابرولو، روغتیايي خدمتونو، د ماشومانو د تغذیې، سرپناه او پاکو څښاک اوبو ته د لاسرسي په برخو کې ولګول شي. د ملګرو ملتونو د بشري مرستو همغږي کوونکي برونو لومارکي هم ټینګار کړی چې دا مرستې به په مستقیم ډول زیانمنو ټولنو ته ورسېږي.
ملګرو ملتونو د افغانستان د بشري مرستو صندوق (AHF) له لارې ۳۰ میلیونه ډالره نورې هم ازادې کړې دي. له دې پیسو سره، افغانستان ته د ځانګړو شویو مرستو ټولیزه اندازه ۴۸ میلیونه ډالرو ته رسېږي. دا اقدام په داسې حال کې کېږي چې هېواد له اقتصادي او بشري کړکېچ سره مخ دی.
د ملګرو ملتونو د اټکل له مخې، تر ۲۰۲۶ کال پورې به د افغانستان تر ۲۱.۹ میلیونو ډېر وګړي پر نړیوالو بشري مرستو متکي وي. دا شمېرې د بشري مرستو بېړنۍ اړتیا څرګندوي.