يمن: د واده پر مراسمو د سعودي بمبار ۲۰ تنه وژلي، ۴۰ ټپيان دي

د یمن په شمال لویدیځ کې روغتیايي او ځايي سرچینو ویلي چې د یوه واده پر مراسمو د سعودي په مشري د ایتلافي الوتکو په بمبار کې لږ تر لږه ۲۰ تنه ووژل شول او ۴۰ تنه نور ټپیان شول.

بمبار تېره شپه ناوخته د «حجه» په سیمه کې را منځته شوی.
د جمهوري روغتون مشر د رویټرز خبري اژانس ته ویلي چې ددوی روغتون ته ۴۰ جسدونه رسیدلي چې اکثره یې په ډیر بد حالت کې ټوټه ټوټه وه.
د نوموړي په وینا په ۴۶ ټپيانو کې يې ۳۰ تنه ماشومان وه چې د واده پر مراسمو د بمبار له امله ټپیان شوي وه.
بلخوا د سیمې خلکو ویلي چې ۲۰ تنه د بمبار له امله مړه او ۳۰ تنه نور ټپیان شول.
باید وویل شي چې د تیرې جمعې په ورځ هم د تعز ښار په لویدیځه کې د بمبار له امله ۱۴ تنه ملکیان وژل شوي او ۴ تنه نور ټپیان شوي وه. دغه برید هم د ایتلافي ځواکونو الوتکو کړی وو.
ویل کیږي چې بمبار پر یوه لوی موټر شوی وو چې له امله یې درنه مرګ ژوبله را منځته شوې وه.
په دې وروستیو کې د سعودي په مشري د ایتلافي ځواکونو الوتکو په یمن کې بمباري زیاته کړې او په ځانګړي ډول ددغه بمباریو له امله اکثره ملکیان وژل کیږي.