افغانستان په اسیا کې د اړمنو هېوادونو د لېست په سر کې ځای لري

آریانانیوز: اوچا په یوه پیغام کې اعلان کړی چې افغانستان په اسیا او اقیانوسیه کې د بشردوستانه مرستو ته د اړتیا وړ هېوادونو د لېست په سر کې دی.

د ملګرو ملتونو د بشري مرستو د همغږۍ دفتر (اوچا) د اعلامیې له مخې، افغانستان، میانمار او پاکستان په ترتیب سره د ملګرو ملتونو د بشري مرستو په لومړیتوبونو کې دي.

د بشردوستانه چارو د همغږۍ لپاره د ملګرو ملتونو دفتر هم اعلان وکړ چې په آسیا او اقیانوسیه کې له اوه څلویښت ملیون څخه ډیر خلک د ملاتړ او ژغورنې لپاره لومړیتوب لري.

تر دې وړاندې د ملګرو ملتونو د بشري مرستو د همغږۍ دفتر ویلي وو، چې سږ کال په افغانستان کې ۲۸ میلیونه خلک مرستو ته اړتیا لري او په دغه هېواد کې ۷۰ سلنه خلک غذايی امنیت نه لري.

د ملګرو ملتونو د ماشومانو وجهي صندوق (یونیسف) په یوه پیغام کې خبرداری ورکړی چې افغانستان په نړۍ کې له ستر بشري ناورین سره مخ دی.