په تخار ولایت کې د طالبانو د استخباراتو لخوا وحشتناکه شکنجه

د تخار ولایت سیمه ییزې سرچینې وايي، د طالبانو استخبارات په خواجه بهاءالدین ولسوالۍ کې خلک نیولي او د برېښنا په شاکونو یې شکنجه کوي.

د سرچينې د معلوماتو له مخې، په تېره يوه مياشت کې په دې ولسوالۍ کې د طالبانو د استخباراتو د مدير مولوي حکيم په امر د خواجه بهاءالدين ولسوالۍ لسګونه ځوانان له کوم جرم پرته نيول شوي دي.

سرچينه وايي، دغه ځوانان د مقاومت له جنګياليو سره د خپلوۍ او هم د ازاد فکر او مدني فعاليتونو له امله د طالبانو د استخباراتو په زندان کې وهل او شکنجه کېږي.

په دې وروستيو کې طالبانو په شمال ختيځو ولايتونو کې د يادو ولايتونو د اوسېدونکو په وژلو، نيولو، هدفي وژنو او وهلو ټکولو پيل کړی، چې په ملي او نړيواله کچه غبرګونونه يې پارولي دي.