حکومت ځکه سقوط ته نږدې دی، چې افغاني صبغه نه لري

آریانانیوز: طالبان وايي ګډ حکومت مخ پر ځوړ او سقوط ته نږدې دی، چې د دوی د تبصرې له مخې پر نورو علتونو سربېره د افغاني صبغې نه لرل يې هم یو علت دی.

طالبانو پر رسمي پاڼه د «د کابل اداره او د سقوط بحران» تر سرلیک لاندې په خپره کړې تبصره کې د غزني به ګډون د هېواد په ګوټ ګوټ کې خپل نظامي پرمختګونه د حکومت د پوځي ماتې نښې بللې.
تبصره کې د حنیف اتمر استعفا‌ء د حکومت د سقوط د ګړندېتوب نښه یاده شوې: «د ګوډاګي رژیم په داخل کې د بې باورۍ او داخلي کشمکش بحران نور هم ژور شوی دی. په دې وروستیو کې په امنیتي چارو کې د اشرف غني د مشاور حنیف اتمر استعفاء او په تعقیب یې د کورنیو چارو او دفاع د وزیرانو او ملي امنیت د رئیس لخوا د استعفاء ګانو وړاندې کول هغه څه دي چې د ګوډاګي رژیم په داخل کې له ژورې نزاع څخه پرده پورته کوي او د رژیم د سقوط پروسه یې تسریع کړې ده.»
تبصره کې د کابل ښار کې هدفي وژنو ته هم اشاره شوې او دا هم د حکومت یوه کمزوري یاده شوې چې ان په مرکز کې يې لوړ پوړي چارواکي په ډار کې ژوند تېروي.
د تبصرې په پای کې د حکومت د سقوط او تزلزل علتونه له ولسي ملاتړه محرومېدل، افغاني صبغه نه لرل او د پردیو له خوا يې تپل کېدل یاد شوي.
«د افغانستان اسلامي امارت په دې باور لري چې د کابل رژیم د تزلزل او سقوط اساسي عامل دا دی چې دغه رژیم اسلامي او افغاني صبغه نلري. د اولس په منځ کې له نفوذ او ملاتړ څخه محروم دی. د کابل اداره یوازې یو تپل شوی رژیم دی چې د وسلو، ډالرو او تبلیغاتو په زور زموږ په ملت تحمیل شوی دی. تاریخي تجربو ثابته کړې ده چې دغه وړ په پردیو پښو ولاړ رژیمونه د بقاء چانس نلري بلکې شړیدل یې هره شیبه ممکن او محتمل وي.»
تازه د امنیت شورا لومړی مرستیال سلیمان کاکړ هم ارګ ته خپله استعفا وړاندې کړې او دلیل يې ځینې «ملحوظات او ستونزې» یادې کړې.