په کابل کې د شهید مزاري لپاره د تلین په مراسمو د توغنديز برید د عاملینو نیول

آریانانیوز: د ملي امنیت ریاست په کابل کې د حقاني شبکې او داعش د پنځه کسيزې ډلې نیولو اعلان وکړ. دغه ریاست وویل چې دغه کسان د بګرام او کابل په هوایی ډګرونو د بریدونو او د عبدالعلي مزاري د تلین پرمراسمو کې د برید مسول وو...

د دې ادارې د خبر پاڼې په وینا ، ملي امنیت ځواکونو د کابل په 17 مه حوزه کې عملیات ترسره کړي ، چې جاوید ، احمد مرید ، روح الله ، عبدالحفیظ او عبدالجبار د حقاني شبکې او داعش د ګډې ډلې غړي نیولي دي.

د خبر پاڼې په وینا ، دغه اشخاص د کابل ښار په بیلابیلو سیمو د راکټونو د ساتنې ، لیږدونې ، خوځښت ، فعالولو او توغولو مسؤلیت په غاړه درلود. دوی د بګرام هوایی ډګر ، د کابل هوایی ډګر او د عبدالعلي مزاري د کلیزې مراسمو باندې د راکټي حملو مسؤلیت هم درلود.

پروسږکال ، د استاد مزاری د تلین مراسم د کابل په لودیځ کې په وسله وال برید کې په نښه شوه ، چې په لسګونو کسان پکې ووژل شول.