دکولرا ناروغۍ له امله هره ورځ ۲۷ ماشومان مري.

آریانانیوز: د عامې روغتیا وزارت چارواکي وايي، په هېواد کې هره ورځ د نس ناستي یا کولرا ناروغۍ له امله ۲۷ ماشومان مري.

د دغه وزارت د چارواکو په وینا دغه شمېر د نږدې لس کاله پخوا پرتله سم نیمايي کموالي ښيي، چې دوی یې لوی سببونه د عامه پوهاوي ډېروالی او روغتیايي خدمتونو ته د خلکو ډېر شوی لاسرسی بولي.
د روغتیا وزارت ویاند وحید مایار ویلي، تېرو کلونو کې هره ورځ نږدې ۵۰ افغان ماشومان د نس ناستې له کبله مړه کېدل.
دده په خبره، نس ناستی موسمي ناروغي ده، چې دوبي کې پرې تر ډېره حده ماشومان اخته کېږي. افغان روغتیايي چارواکي وايي، د عامې روغتیا په طبي مرکزونو کې یې ځانګړي روغتیا پالان ګومارلي چې د نس ناستې مخنیوي لپاره خلکو ته د اوبو او چاپېریال پاکولو مشورې ورکړي او په درملنه کې مرسته ورسره وکړي.