د خبریالانو ځورونه

آریانانیوز: له ازادو رسنیو د ملاتړ اداره «نی» وایي، د افغان حکومت تر زنه لاندې د افغان خبریالانو ځورونه ورځ تربلې زیاتېږي؛ خو حکومت یې په وړاندې هيڅ ګام نه اخلي
نی وروسته له هغه حکومت د افغان خبریالانو په وړاندې په تاوتریخوالي تورنوي، چې څو ورځې وړاندې د سمنګان ولایت د مرستیال والي ساتونکو خبریالان په «مچانو» یاد کړل
په سمنګان ولایت کې د سیمای صلح په نوم د یوې سیمه ئیزې راډيو مسئول «اسماعیل سادات» وايي، وروسته له هغه چې د مرستیال والي ساتونکو خبریالان په مچانو یاد کړل ، دوی دا موضوع له مرستیال والي سره شریکه کړه؛ خو هغه د خپل ساتونکي له خبرو دفاع وکړه او ويې ویل « ستونزه په تاسو خبریالانو کې ده، په دې وروستیو کې د خبریالانو په جامه کې ځانمرګي بریدونه زیات شوي، زما ساتونکي ښه ویلي، تاسو خبریالان د مچانو په څېر هر لور ګرځی»
مرستیال والي ددې تر څنګ زیاته کړه، چې اصل توهین دادی، چې ستاسو په سر باندې د توپک میل مات شي
نی داسې مهال حکومت د خبریالانو په وړاندې په تاوتریخوالي تورنوي، چې حکومت وايي، رسنۍ ورته سره کرښه ده او هر اړخیزې همکارۍته یې تیار دي.