له ایرانه څخه 650 تنه افغانی بندیان افغانستان ته را لېږدول شوي دی.

آریانانیوز: له ايرانه د افغان زندانيان د رالېږد پلاوي مشر عزيزاحمد سرباز، د لويې څارنوالۍ له وياند جمشېد رسولي سره په کابل کې په ګډه خبري ناسته کې وويل چې له څلورو تر پنځو زرو افغانان د ايران په بېلابېلو زندانونو کې بنديان دي.

ده د جزئياتو له ورکولو پرته وويل چې له دغو زندانيانو ٦٥٠ یې څو اوونۍ وړاندې افغانستان ته رالېږدول شوي، دا مهال په هرات ساتل کېږي او روغتيايي حالت یې د ډاډ وړ دی.
د هغه د معلوماتو له مخې، په ١٣٩٥ او ١٣٩٦ کلونو کې هم ٦٣٠ افغان بنديان له ايرانه افغانستان ته رالېږدول شوي دي.
د ده په وينا، له ايرانه افغانستان ته د رالېږدول شوو افغان بنديانو پر دوسيو له سره غور کېږي او د حبس په موده کې یې بدلون راوستل کېږي.
د هغه په وينا، کېداى د راتلونکي ١٣٩٨ کال تر نيمايي تر دوه زره نور افغان بنديان هم له ايرانه افغانستان ته را ولېږدول شي.
د ده په خبره، هغه افغان بنديان چې د محکمې وروستى حکم ولري، هويت يې تثبيت وي او د لېږد رضايت ولري، افغانستان ته رالېږدول کېږي.
سرباز زياته کړه: “ايران موږ ته ويلي چې دا مهال د ايران په زندانونو کې له ۴۰۰۰ تر ۵۰۰۰ افغانان بنديان دي او له دې ډلې زرو تنو ويلي چې نه غواړي افغانستان ته ولېږدول شي.”
هغه وايي، په افغانستان کې د ايران له زندانيانو سره هم ورته چلند شوی او تر دې مهاله د افغانستان له زندانونو ۷۸ تنه ايراني زندانيان ايران ته لېږدول شوي او شاوخوا ۸ تنه نور ايرانيان لا هم په افغانستان کې زنداني دي.
د کډوالو او بېرته راستنېدونکو چارو وزارت د معلوماتو له مخې، دا مهال په ايران کې نږدې ٨٠٠زره افغان کډوال په قانوني او نږدې يو ميليون په ناقانونه ډول په دغه هېواد کې د کډوالۍ ژوند کوي.
د لويې څارنوالۍ وياند وويل چې له ايرانه افغانستان ته په رالېږدل شوو بنديانو او هغو افغانانو کې چې اوس هم په ايران کې بنديان دي، د بېلابېلو جرمونو په تړاو پر بند محکوم شوي کسان شامل دي، خو ډېر يې د نشه يي توکو د قاچاق په تور پر بند محکوم شوي دي.
هغه زياته کړه: “لويه څارنوالي د خلکو د حقونو او ازادۍ د يوې ملاتړې ادارې په توګه تل هڅه کوي چې په کور دننه او له هېواده بهر د خپلو وګړو د حقونو ساتنه وکړي او له بهره هېواد ته د افغان بنديانو رالېږدول، د ملي يووالي حکومت له پروګرامونه څخه دي.”
ده وويل چې دا مهال افغانستان له تاجکستان، روسيې او ايران سره د زندانيانو د لېږد رالېږد هوکړه ليکونه لري او ډېر ژر به ورته هوکړه ليکونه د پاکستان په ګډونو له ځينو نورو هېوادونو سره هم لاسليک شي.
هغه ونه ويل چې دا مهال څومره افغانان له ايران پرته په نورو هېوادونو کې بنديان دي.