د افغانستان دښمنانو ته د ولسمشر د دوهم مرستیال مهم پیغام

آریانانیوز: د ولسمشر دوهم مرستیال سرور دانش د دایکندي ولایت له یو شمیر ښوونکو سره په کتنه کې وویل چې د افغانستان خلک او امنیتي او دفاعي ځواکونه په کلکه د ځان او خپل هیواد دفاع کوي او دښمن ته به اجازه ورنکړي چې خپلو ناوړه اهدافو ته ورسیږي...

ښاغلي دانش پرون د دایکندي ولایت له یو شمیر ښوونکو سره په کتنه کې د هیواد امنیتي وضعیت ته په اشارې سره وویل چې د افغانستان خلک د داسې دښمن سره مخ دي چې هیڅ ارزښت ته غاړه نه ږدي او یوازې غواړي د وژلو او تاوتریخوالي له لارې خپل هدف ترلاسه کړي.

هغه زیاته کړه چې د افغانستان خلک او امنیتي او دفاعي ځواکونه په کلکه د ځان او خپل هیواد دفاع کوي او دښمن ته به اجازه ورنکړي چې دغه ناوړه اهداف ترلاسه کړي.

د لویدیز کابل او د هیواد د مرکزي سیمو یو شمیر برخو کې د امنیتي وضعیت په اړه د اندیښنو په اړه ، د ولسمشر مرستیال وویل چې د دې سیمو د امنیت د تامین لپاره جدي تدابیر نیول شوي دي ، او همداشان د خلکو په مشورې جوړ شوي پلانونه ولسمشر ته سپارل شوي دي.

وروسته له هغه چې د کابل په لودیځ کې د سید الشهدا ښوونځي مخې ته د موټر بم چاودنه وشوه او په سلګونو یې شهیدان او ټپیان کړل, د ولسمشر دوهم مرستیال د امنیت پلان د چمتو کولو په موخه په لویدیځ کې د کابل له استازو سره مشورتي ناسته وکړه.