افغانستان ته د کرکټ نړيوال جام راوړل

آریانانیوز: دیوراپورپه اساس د کرکت نړيوال جام د روانې اوونۍ په اوږدو کې افغانستان ته راوړل کېږي.

د کرکټ د نړيوالې شورا له اصولو سره سم کوم هېوادونه چې د کرکټ نړيوال جام ته لاره پيدا کوي، نو تر سياليو مخکې دغه جام اړوندو هېوادونو ته وړل کېږي.
د افغانستان کرکټ بورډ وياند فريد هوتک د مرغومي په لومړۍ نېټه کی وويل چې دا جام به د روانې اوونۍ د چهارشنبې په ورځ د مرغومي په پنځمه سهار مهال د کابل هوايي ډګر ته راوړل کېږي.
نوموړى وايي چې په هوايي ډګر کې به د کرکټ بورډ مسوولينو، چارواکو او مينه والو له خوا به د دغه جام راوړلو په خوښۍ کې جشن نيول کېږي.
د هوتک په وينا، په کابل کې له څو پروګرامونو وروسته به دا نړيوال جام باميان، کندهار او هرات ولايتونو ته هم یووړل شي.
د کرکټ بورډ وياند وايي چې دغو ولايتونو ته د نړيوال جام د وړلو موخه په دغه ولايت کې د کرکـټ لوبې ته وده او پرمختګ ورکول دي.
د يادونې ده، د افغانستان په ګډون لسو هېوادونو د يوه ورځني کرکټ نړيوال جام ته لاره موندلې وه چې ټاکل شوې د ٢٠١٩ کال په مې مياشت کې په انګلستان کې ترسره شي.
څلور کاله مخکې هم چې افغانستان نړيوال جام ته لاره موندلې، نو دغه جام کابل ته راوړل شوى و.