یوه پولیس خپل اته ملګري پولیس ووژل

آریانانیوز: د هلمند په مرکز لښکرګاه کې د يوه نفوذي پوليس له لوري اته نور پوليس وژل شوي دي.

په هلمند کې يوې امنيتي سرچينې د سلواغې په ٢١مه پژواک خبري اژانس ته وويل چې تېره شپه د مرکز لښکرګاه په سرګودر سيمه کې يو نفوذي پوليس اته نور پوليس وژلي دي.
دى وايي چې په دې وخت په نورو پوستو کې هم د امنيتي ځواکونو او طالبانو ترمنځ جګړه شوې، مرګ ژوبله لري خو کره شمېره يې تر اوسه معلومه نه ده.
خو د هلمند د والي وياند عمر ځواک بيا پژواک ته وويل چې په دې پېښه کې شپږ پوليس وژل شوي دي.
بل لور ته طالبان هم دغه پېښه تاييدوي.
د دې ډلې وياند قاري يوسف احمدي پژواک ته وويل چې د دوى د يو نفوذي کس له لوري نهه امنيتي سرتېري وژل شوي او د هغوی وسلې يې هم له ځان سره طالبانو ته انتقال کړې ده.