د طالبانو او سعودي اړیکو عادي کول؛ نوی سفیر کابل ته روان دی

د طالبانو او سعودي عربستان اړیکې، د اوږدمهاله تاوتریخوالي وروسته، اوس د عادي کېدو په حال کې دي. د سعودي عربستان نوی سفیر به په راتلونکو ورځو کې کابل ته راورسیږي او خپله دنده به پیل کړي.

له هغه وروسته چې د طالبانو او سعودي عربستان اړیکې عادي شوې، نوی سعودي سفیر به ډېر ژر په کابل کې خپل کار پیل کړي.

د طالبانو د بهرنیو چارو وزارت یوه سرچینه ویلي چې طالبان چمتو دي چې په کابل کې د نوي سعودي سفیر هرکلی وکړي. د نوموړي په وینا، نوی سفیر به په لسو ورځو کې کابل ته ورسي او په رسمي ډول خپلې دپلوماتیکې چارې پیل کړي. دا ګام به د دواړو هېوادونو اړیکې نورې هم ژورې کړي.

سعودي عربستان د طالبانو پر واکمنۍ خوښ نه و او د دې ډلې حکومت یې تر اوسه په رسمیت نه دی پېژندلی. د سعودي مشران د ملا هبت‌الله څخه ناخوښ دي، او په تېرو درې نیمو کلونو کې د دواړو خواوو اړیکې یخې وې.

یوه د اختلاف ټکی دا و چې طالبانو د امریکا سره د خبرو پر مهال په دوحه کې خپل رسمي دفتر وساته، نه په جدې کې، چې سعودي عربستان ناراضه کړ. سربېره پر دې، طالبانو په مذهبي مناسبتونو لکه د اخترونو په اعلانولو کې له سعودي حکومت څخه خپلواکي ښکاره کړه.

خو وروسته له دې چې د طالبانو ځینو چارواکو، لکه سراج الدین حقاني، مولوي وثیق او ملا یعقوب، سعودي ته پټې سفرونه وکړل او د منځني ختیځ پرمختګونو سره، د طالبانو او سعودي اړیکې تودې شوې.

شنونکي په دې باور دي چې د دواړو خواوو اړیکې د سیمې د راتلونکي لپاره د یوې سترې نقشې پر بنسټ بیا پیل شوې دي. د چارو پوهانو په وینا، د امریکا نوی حکومت د سعودي، اماراتو او قطر په همکارۍ غواړي چې معتدل طالبان او د ملا هبت‌الله مخالفین پیاوړي کړي، څو دوی د خپلو سیمه‌ایزو سیاستونو لپاره وکاروي.

موجود راپورونه ښيي چې د افغانستان او سیمې حالت به په راتلونکي کې ډېر پیچلی شي.