طالبان: پاکستان د تورخم د لارې د تړلو مسوول دی

د طالبانو د بهرنیو چارو وزارت د تورخم دروازې د تړلو په اړه اعلامیه خپره کړه.

د طالبانو د بهرنیو چارو وزارت په یوه خبرپاڼه کې ویلي چې دغه ډله د پاکستان له لوري د تورخم دروازې تړل او پر افغان امنیتي ځواکونو ډزې د ښه ګاونډیتوب خلاف عمل ګڼي.

د طالبانو د بهرنیو چارو وزارت همداراز زیاته کړې چې د پاکستان حکومت د تورخم دروازه وروسته له هغه وتړله چې د تېرې چهارشنبې په ورځ پاکستاني ځواکونو پر افغان سرحدي ځواکونو ډزې وکړې چې دوی د یوې امنیتي پوستې په ترمیمولو بوخت وو چې کلونه وړاندې جوړه شوې وه.

په دغه اعلاميه کې ويل شوي چې د تورخم لارې بندېدل به د دواړو هېوادونو او سيمې پر سوداګرۍ ناوړه اغېز وکړي او د دواړو غاړو ګډو سوداګرو ته به مالي او ځاني زيانونه واړوي.