جبار قهرمان په يوه چاودنه کې ووژل شو

آریانانیوز: د هلمند په لښکرګاه ښار کې ولسي جرګې ته نوماند عبدالجبار قهرمان په ټاکنيز دفتر کې چاودنه شوې ده چې نوموړی په کې وژل شوی دی او ګڼ نور ټپيان دي.

د هلمند ولايت چارواکي وايي چې دغه چاودنه څو شيبې وړاندې د عبدالجبار قهرمان په ټاکنيز دفتر کې شوې ده.
د هلمند د والي وياند عمر ځواک وايي په دغه چاودنه کې د ولسي جرګې نوماند عبدالجبار قهرمان وژل شوی او اته تنه نور ټپيان دي.
ځواک زياتوي چې چاوديدونکي توکي د جبار قهرمان په کوچ (د کيناستو چوکۍ) کې ځای په ځای شوي وو چې وچادېدل.
د طالبانو وياند قاري محمد يوسف احمدی د بريد مسؤليت په غاړه اخيستی او ويلي يې دي چې عبدالجبار قهرمان يې له څو مهمو مشاورينو سره په يوه تکتيکي چاودنه کې وژلی او ۶ ساتونکي يې ټپیان کړي دي.
له هغې ورځې چې ټاکنيزې منډې ترړې پيل شوي دي دا لسم نوماند دی چې په چاودنو او بريدونو کې خپل ژوند له لاسه ورکوي.