پاکستاني رسنۍ: د نړیوالو مکلفیتونو له مخې باید اسلام اباد د افغان کډوالو ملاتړ وکړي

آریانانیوز: د پاکستان ډان ورځپاڼې د طالبانو او پاکستان ترمنځ سرحدي شخړې ته په اشارې سره لیکلي چې د پاکستان حکومت باید د خپلو نړیوالو مکلفیتونو پر بنسټ د افغان کډوالو ملاتړ وکړي.

دې ورځپاڼې د دغه راپور په خپرولو سره لیکلي چې د طالبانو او پاکستان ترمنځ سرحدي ستونزې باید د مهاجرینو د څنډې ته کیدو لامل نه شي.

د راپور د شمېرو له مخې په پاکستان کې شاوخوا درې میلیونه افغان کډوال مېشت دي. شاوخوا ۱.۴ میلیونه او ۸۴۰ زره نور پناه غوښتونکي د پاکستان لخوا صادر شوي کارتونه لري.

ویل کېږي چې ۷۷۵ زره افغان کډوال له رسمي اسنادو پرته اوسېږي.

د ډان ورځپاڼې لیکوال سکندر احمد شاه ټینګار کړی، چې پاکستان باید د افغان کډوالو په څېر د زیانمنونکو کسانو د ساتنې لپاره پر خپلو ژمنو عمل وکړي.

د يادونې وړ ده، چې په دې وروستيو اوونيو کې د پاکستان او طالبانو ترمنځ پر پوله ترینګلتیا زيات شوى او د دواړو غاړو تر منځ څو ځلې نښتې هم شوې دي.