دقطر ناستی د پلاوي د ټاکنې غونډه، دپخوانی ولسمشرحامد کرزي په دفتر کې

آریانانیوز: د قطر ناسته چې د بېلابېلو علتونو له امله د اپریل له ۱۴مې د دې میاشتې ۱۹مې ته وځنډول شوه، خو لا هم حکومت نه دی توانېدلی چې دې غونډه کې د برخې اخیستو لپاره د پلاوي کسان وټاکي.

د کابل نیوز د خبر پر اساس د همدې پلاوي د ګمارنې لپاره غونډه د ارګ پر ځای د حامد کرزي دفتر کې وشوه، څوک چې د حکومت تر فشار لاندې دی او ترې غواړي چې دې غونډه کې ګډون ونه کړي، خو پلویان يې بیا پر ګډون ټینګار کوي.
حکومت د مختلفو فشارونو وروسته بالاخره ومنله چې د دې ناستې لپاره به دوی هم د نورو افغانانو په ګډون یو ملي ټیم ټاکي چې له طالبانو سره به په دوحه ناسته کې برخه اخلي.
حکومت د بېلابېلو فشارونو له امله ظاهراً دې ته تیار شو، چې د پلاوي پر ګمارنې بحثونه وکړي، خو ځينې سرچینې دا هم وايي چې د حکومت د «مصالحې شورا» په نوم غړي او ځينې سیاسیون هڅه کوي غونډه له خنډ او ځنډ سره مخ کړي.
همدارازهم یوې باخبرې سرچینې وویل چې د افغانستان حکومت، د سولې شورا د ځینو غړو، استاد عبدرب الرسول سیاف او ګلبدین حکمتیار نظر دادی چې دا غونډه باید یا وځنډول شي، لغوه شي او یا هم په کوم بل هیواد کې جوړه شي.
د سرچینې په حواله په داسي وخت کې چې استاد سیاف په نظر یاده غونډه د افغان ولس په ګټه نه ده، باید مخنیوی یې وشي، استاد سیاف د «مصالحې شورا» په هغه ډلګۍ کې هم دی چې د سولې د خبرو اترو لپاره باید «سرې کرښې» معلومې کړي.
سرچینه زیاتوي د حزب اسلامي مشر حکمتیار بیا ټینګار کوي، چې غونډه د قطر پر ځای باید په اسلام اباد، ابوظبۍ او یا هم په جده ښار کې وشي.
د شنونکو په باور ښه به وي چې دا غونډه ژر جوړ او پر وړاندې سبوتاژ کوونکو ته ډېر فرصتونه ور نه کړل شي.