یونان په وروستیو میاشتو کې شاوخوا ۱۷۰۰۰ کډوال د ترکیې اوبو ته شړلي دي

د مهاجرینو د حقونو لپاره د ملګرو ملتونو ځانګړي راپور ورکوونکي، فیلیپ ګونزالیز مورالس، په یوه راپور کې ویلي چې یوناني ځواکونو په وروستیو میاشتو کې لږترلږه 17,000 کډوال له خپلو سمندري پولو څخه د ترکیې اوبو ته ایستلي دي.

په دغه راپور کې چې د اروپا د پناه غوښتونکو او تبعید شویو شورا له خوا خپور شوی، ټینګار کوي چې د یونان له سمندري پولو څخه د پناه غوښتونکو ایستل د اروپايي هېوادونو رسمي پالیسي ګرځېدلې ده.

مورالس د دغه ډول اقداماتو د اندېښمنوونکې پايلې او د دغې تګلارې د دوام په اړه د نړيوالو خبرداريو په وړاندې د اروپايي هېوادونو د بې پامۍ خبره کړې ده.

هغه د مهاجرت د اقداماتو او پالیسیو د پایلو د پټولو لپاره د اروپایی هیوادونو د هڅو په اړه هم خبرداری ورکړ.

د مهاجرینو د حقونو په برخه کې د ملګرو ملتونو ځانګړي راپور ورکوونکي هم د یونان له پناه غوښتونکو سره د چلند له امله نیوکه کړې او ټینګار یې کړی چې دغه هېواد د افغانستان، سوریې، پاکستان، سومالیا او بنګله دېش د وګړو د پناه غوښتنې ټول غوښتنلیکونه ترکیې ته استولي دي.

هغه دا هم وویل چې ازادو بحرونو ته د پناه غوښتونکو شړل د یونان د حکومت یوه عملي پالیسي ګرځیدلې او زیاته کړې یې ده چې لږ تر لږه ۱۷۰۰۰ پناه غوښتونکي چې د کښتیو په واسطه یونان ته د رسیدو هڅه کوله ازادو بحرونو ته ویستل شوي دي.

په راپور کې پر یونان هم نیوکه شوې چې پر کډوالو پلوه نادولتي موسسو یې سخت محدودیتونه لګولي دي.