کشمیر ته نور زرګونه پوځیان لیږل

آریانانیوز: دیوراپور په اساس د خبر له مخې مسعود خان په کشمیر کښې د یوې بلې غمیزې د احتمال خبر ورکړ او ویې ویل: هندوستان کشمیر ته د څلور لکو پوځي ځواکونو د لیږلو تیاری کوي څو د دغې سیمې امنیت ګډوډ کړي.
مسعود خان زیاته کړه: که دغه پوځیان کشمیر ته لاړ شي نو له کشمیریانو سره به یې جنګ او نښتې کلونه کلونه اوږدې شي او راتلونکي نسلونه به هم د سترو ناندریو کتونکې وي.
د پاکستان ترکنټرول لاندې کشمیر مشر وویل: هند هڅه کوي چې د کشمیر د خلکو ترمینځ اختلاف واچوي او له دې لارې کشمیري مشران نابود کړي.
هغه ټینګار وکړ چې د هند تر کنټرول لاندې کشمیر مسلمانان د مودي د حکومت خلاف خپل مقاومت جاري وساتي او پرې نږدي چې نوی ډیلی په کشمیر کښې خپلو سپیرو موخو ته ورسیږي.
د نوې ډیلي حکومت په تیرو دریو لسیزو کښې له یو لاکه زیات کشمیریان وژلي او هم داشان لس زره کسان بیخي بې درکه شوې دي.