استغفار

(اَسْتَغْفِرُ اللهَ الَّذِي لااِلهَ اِلّا هُوَ الْحَیُّ الْقَیُّوْمُ وَاَتُوْبُ اِلَیْهِ)
د رمضان مبارکې ورځې دي هره دعاء پکې ډېره قبول ته نېږدې وي پدې امید چې زمونږ استغفار به هم الله تعالی په خپل در کې قبول کړي په تېرو برخو کې مو د استغفار د فضیلت په اړه یوڅو آیتونه او احادیث ذکر کړي وو بیا مو د استغفار لپاره پنځه فایدې یادې کړې وې په تېر پسې …
(اَسْتَغْفِرُ اللهَ الَّذِي لااِلهَ اِلّا هُوَ الْحَیُّ الْقَیُّوْمُ وَاَتُوْبُ اِلَیْهِ)
د استغفار شپږ مه فايده : د دنيا او آخرت خير
په استغفار کې ددنيا او آخرت خير نغښتل شوى دى او د دنيا او آخرت ټولې نيکيانې په استغفار کې دي هغه څوک چې د الله تعالی نه د خپلو ګناهونو بښنه غواړي الله تعالی ورته د دنیا او آخرت خیر ور په برخه کوي لکه حضرت نوح علیه السلام چې خپل قوم ته ویل : فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا ﴿10﴾ يُرْسِلِ السَّمَاء عَلَيْكُم مِّدْرَارًا ﴿11﴾ وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا ﴿12﴾. (سورة النوح)
ترجمه : (نوح علیه السلام فرمايي ) نو مې وويل دوى ته بښنه وغواړئ له ربه خپله (له شرکه) بېشکه هغه (الله تعالی) دى ډېر بښونکى (توبه کوونکيو لره هر کله چې توبه وباسي) را وبه ليږي باران پر تاسې باندې ډېر اورېدونکى او در ډېروي کومک به کوي له تاسې سره په مالونو او زامنو سره او وبه ګرځوي تاسې ته باغونه او وبه ګرځوي تاسې ته ويالې .
ددې امله خو حضرت حسن بصري رحمه الله ته يو کس راغلو ورته ويل يې په ژوند کې مې مشکلات ډېر دي .
حسن بصري رحمه الله ورته وويل : د الله تعالی نه د خپلو ګناهونو بښنه وغواړه او استغفار ډېر وايه.
بل کس ورته راغلو ورته ويل يې : ډېر زيات غريب يم .
حسن بصري رحمه الله ورته وويل : استغفار ډېر وايه .
بل کس ورته راغلو ورته ويل يې : باغ مې وچ شو .
حضرت حسن بصري رحمه الله ورته وويل : استغفار ډېر وايه او د الله تعالی نه د خپلو ګناهونو بښنه وغواړه .
بل کس ورته راغلو ورته ويل يې : اولاد مې نشته .
حضرت حسن بصري رحمه الله ورته ويل : استغفار ډېر وايه بيا يې ورته همدا پورتني آیتونه تلاوت کړل او ورته یې وویل چې د دنیا او آخرت خیر په استغفار کې نغښتل شوی دی .

حضرت هود علیه السلام هم خپل قوم ته همدا وصيت کاوه ورته فرمايل يې :
وَيَا قَوْمِ اسْتَغْفِرُواْ رَبَّكُمْ ثُمَّ تُوبُواْ إِلَيْهِ يُرْسِلِ السَّمَاء عَلَيْكُم مِّدْرَارًا وَيَزِدْكُمْ قُوَّةً إِلَى قُوَّتِكُمْ وَلاَ تَتَوَلَّوْاْ مُجْرِمِينَ ﴿52﴾. (سورة هود)
ترجمه : او اې قومه زما مغفرت وغواړئ له رب خپل بيا رجوع وکړئ پر طرف د دغه (الله تعالی په طاعت سره) چې وبه ليږي (الله تعالی له جانبه د) آسمان پر تاسې (باران) اورېدونکى (په شيبو شيبو) او درزيات به کړي الله تعالی تاسې ته قوت پر قوت ستاسې او مخ مه ګرځوئ تاسې (له ايمانه او توبې) حال دا چې ګنهګاران اوسېږئ.
همدارنګه حضرت هود علیه السلام خپل قوم ته همدا مضمون په نورو الفاظو کې ويل ورته فرمايل
وَأَنِ اسْتَغْفِرُواْ رَبَّكُمْ ثُمَّ تُوبُواْ إِلَيْهِ يُمَتِّعْكُم مَّتَاعًا حَسَنًا إِلَى أَجَلٍ مُّسَمًّى وَيُؤْتِ كُلَّ ذِي فَضْلٍ فَضْلَهُ وَإِن تَوَلَّوْاْ فَإِنِّيَ أَخَافُ عَلَيْكُمْ عَذَابَ يَوْمٍ كَبِيرٍ ﴿3﴾. (سورة هود)
ترجمه : او (پس له توحيده امر کوم) چې مغفرت وغواړئ له ربه خپله ( د تېرو ګناهونو) بيا رجوع وکړئ الله تعالی ته (په طاعت سره له ګناه نه) چې فايده در رسوي تاسې ته په نفع غوره سره تر هغې نيټې ټاکلې (مقرر کړل) شوې پورې او وربه کړي (الله تعالی) هر خاوند د فضل ته فضل د هغه او که وګرځېدئ تاسې (اې کفارو له اسلامه) نو بېشکه زه وېرېږم پر تاسې له عذابه د ورځې لوئې نه (د قيامت) .
امام قتاده رحمه الله فرمايي چې د هري نيکي راز دادى چې انسان نېک عملونه وکوي او کوم بنده چې نېک شي او خپل اعمال اصلاح کړي نو له هرې خوا به ورته نعمتونه را روان وي او په ژوند کې به يې تکليفونه او مشکلات کم وي لکه الله تعالی چې فرمايي :
مَنْ عَمِلَ صَالِحًا مِّن ذَكَرٍ أَوْ أُنثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُم بِأَحْسَنِ مَا كَانُواْ يَعْمَلُونَ ﴿97﴾. (سورة النحل)
ترجمه : هر چا چې وکړ نېک (عمل) له نارينه څخه يا له ښځينه څخه حال دا چه دي مؤمن وى نو خامخا ژوندون به ورکړو خامخا هغه ته ژوندون طيبه (پاکيزه) او خامخا جزا به ورکړو دوى ته اجر د دوى په ډېر ښه د هغوى (نيکيو) سره چې وو دوى (په دنيا کې) چې کولې به يې .
(اَسْتَغْفِرُ اللهَ الَّذِي لااِلهَ اِلّا هُوَ الْحَیُّ الْقَیُّوْمُ وَاَتُوْبُ اِلَیْهِ)
رسول الله صلی الله علیه وسلم ته يو کس راغلو ورته ويل يې :
زه چې د خپل رب نه سوال کوم نو څنګه سوال ورڅخه وکوم؟ رسول الله صلی الله علیه وسلم ورته وفرمايل داسې وايه :
اللَّهُمَّ اغْفِرْ لِي، وَارْحَمْنِي، وَعَافِني، وارْزُقْنِي، فإنَّ هؤلاَءِ تَجْمَعُ لَكَ دُنْيَاكَ وَآخِرَتَكَ. (رواه مسلم)
ترجمه : اې زما الله تعالی ماته بښنه وکوه په ما رحم وکوه ماته روزي راکړه ځکه دا الفاظ ستا د دنيا او آخرت خير ستا لپاره جمع کوي .
يو بل کس چې نوى په اسلام مشرف شو رسول الله صلی الله علیه وسلم ته يې وويل : اوس چې ما اسلام راوړو ماته څه کلمې وښايه چې زه يې وايم رسول الله صلی الله علیه وسلم ورته وويل : قُلِ اللَّهُمَّ قِنِي شَرَّ نَفْسِي، وَاعْزِمْ لِي عَلَى أَرْشَدِ أَمْرِي، اللَّهُمَّ اغْفِرْ لِي مَا أَسْرَرْتُ، وَمَا أَعْلَنْتُ، وَمَا أَخْطَأْتُ، وَمَا عَمِدْتُ، وَمَا جَهِلْتُ . (رواه الامام احمد رحمه الله)
ترجمه : اې زما الله تعالی ما د خپل نفس له شر څخه وساته ماته توفيق راکړه چې د ښو کارونو قصد او اراده وکوم اې الله تعالی ماته زما هغه ګناهونه وبښه چې ما پټ کړي وي او هغه چې ما ښکاره کړي وي او هغه چې ما په خطاء سره کړي وي او هغه چې ما په قصد سره کړي وي او هغه چې ما په ناپوهي سره کړي وي .
معنى دا چې په هر ډول کې د الله تعالی نه د خپلو ګناهونو بښنه وغواړه همدا استغفار دى نو رسول الله صلی الله علیه وسلم ته چې يو کس راغلو چې څه ووايم رسول الله صلی الله علیه وسلم په ټولو دعا ګانو کې دا ورته وښوده چې د خپلو ګناهونو بښنه وغواړه ځکه رسول الله صلی الله علیه وسلم پدې پوهېدو چې د دنيا او آخرت خير په همدې کې دى چې يو بنده د خپلو ګناهونو بښنه وغواړي .
بل کس رسول الله صلی الله علیه وسلم ته وويل يا رسول الله صلی الله علیه وسلم زه څه ووايم؟ رسول الله صلی الله علیه وسلم ورته وفرمايل داسې وايه :
قُلْ اللَّهُمَّ اغْفِرْ لِي، وَارْحَمْنِي وَعَافِنِي، وَاهْدِنِي، وَارْزُقْنِي . (رواه ابو داود رحمه الله)
ترجمه : اې الله تعالی ماته بښنه وکوه ، په ما رحم وکوه ، ماته عفوه وکوه ، ماته هدايت وکوه ، ماته رزق راکړه .
حضرت ابو بکر صديق رضی الله عنه فرمايي ما رسول الله صلی الله علیه وسلم ته وويل ماته داسې يوه دعا وښايه چې په مانځه کې يې ووايم رسول الله صلی الله علیه وسلم راته وفرمايل داسې وايه : اللَّهُمَّ إِنِّي ظَلَمْتُ نَفْسِي ظُلْمًا كَثِيرًا، وَلا يَغْفِرُ الذُّنُوبَ إِلاَّ أَنْتَ، فَاغْفِرْ لِي مَغْفِرَةً مِنْ عِنْدِكِ، وَارْحَمْنِي إِنَّكَ أَنْتَ الْغَفُورُ الرَّحِيمُ . (صحیح البخاري)
ترجمه : اې الله تعالی ما په خپل ځان باندې ظلم کړى دى ډېر زيات او ستا نه بغير نور څوک ګناهونه نه بښي ماته د خپله ځانه مغفرت وکوه په ما باندې رحم وکوه بېشکه ته بښونکى او مهربان يې .
بل کس رسول الله صلی الله علیه وسلم ته راغلو ورته ويل يې : يا رسول الله صلی الله علیه وسلم زه خبر شوم چې تا د شپې يوه دعاء ويله : اللَّهُمَّ اغْفِرْ لِي ذَنْبِي، وَوَسِّعْ لِي فِي دَارِي، وَبَارِكْ لِي فِيمَا رَزَقْتَنِي .
ترجمه : اې زما الله تعالی ماته زما ګناهونه وبښه او زما کور راته ازاد کړه او هغه چې تا ماته راکړي دي په هغه کې ماته برکت واچوه .
رسول الله صلی الله علیه وسلم ورته ويل : هو نو پدې دعاء کې تاته داسې څه ښکاره کيږي چې لدې دعاء نه پاتې شوي وي ؟
يعني ما د شپې دا دعاء ځکه کوله چې پدې دعاء کې د دنيا او آخرت خير را ټول کړل شوى دى ځکه چې يو بنده دا ووايي چې اې الله تعالی ماته زما د ګناهونو بښنه وکوه نو ده د آخرت د هر ډول خير او نعمت غوښتنه په دې دعاء کې وکوله ځکه له يو انسان څخه چې ګناهونه پاک شي دا به په آخرت کې جنت ته ځي او جنت د هر ډول نيکيو سر دى .
الله د پدې مبارکه میاشت کې زمونږ استغفار قبول کړي:
(اَسْتَغْفِرُ اللهَ الَّذِي لااِلهَ اِلّا هُوَ الْحَیُّ الْقَیُّوْمُ وَاَتُوْبُ اِلَیْهِ)