په لوډ سپیکرونو کې د حکومت په غوښتنه قران کریم غږول

آریانانیوز: درسینوپه رپوټ د جُمعې او جماعت لمنځونو له ځنډولو څو اونۍ وروسته د الجزائر حکومت د جوماتونو امامانو ته سپارښتنه کړې، چې له کرونا وایرس سره د مبارزې په لړ کې د لوډ سپیکرونو له لارې څخه د قران کریم تلاوت خپور کړي
د الجزائر د دیني چارو وزارت د یوې اعلامیې په خپرولو سره څرګنده کړې چې په لوډ سپیکرونو کې د قران کریم د خپراوي په تړاو د هېوادوالو د پرلپسې غوښتنو په جواب کې د جوماتونو ملا امامانو ته سپارښتنه کوو، چې د ماسپښين له اذان نیم ساعت مخکې په جوماتونو کې د لوډ سپیکرونو له لارې د قران کریم تلاوت خپور کړي
دغه وزارت له خپلو ولایتي رئیسانو څخه غوښتي، چې له ولایتي چارواکو سره په همغږۍ دې په هره سیمه کې د لوډ سپیکرونو له لارې د قران کریم د خپرولو موده (نیم ساعت څخه کم یا زیات) او ورځني مهال ویش برابر کړي
که څه هم په دغه اعلامیه کې ددې پریکړې د پلي کولو نیټه نه ده په ډاګه شوې؛ خو د الجزائر د دیني چارو وزارت یو شمېر سرچینو «اناتولیه» خبري آژانس ته ویلي چې دا پرېکړه به سر نن ورځې څخه په ټول هېواد کې پلې کیږي
له کرونا وباء سره د مبارزې په لړ کې د الجزائر حکومت د روان کال مارچ میاشتې له اوولسمې نیټې څخه په ټول هېواد کې د جُمعې او جماعت په لمنځونو بندیز په داسې حال کې لګولی چې د پنځه وخته لمونځونو لپاره اذانونه په خپلو ټاکلو وختونو ترسره کیږي
د حکومت له دغه پرېکړې وروسته ګڼ شمېر خلکو او فعالانو د ټولنیزو رسنیو له لارې له غوښتنه کوله، چې د «کور پاتې شئ» په موده کې باید د جوماتونو له لوډ سپيکرونو څخه د عامه پوهاوي درسونه او خلکو ته د مورال ورکولو په خاطر د قران کریم تلاوتونه خپاره شي، ځکه د کرونا وایرس د خپرېدو له امله په خلکو کې زیاته ویره خپره شوې ده
د جان هاپکنز پوهنتون د شمېرو له مخې په الجزائر کې د کرونا وباء له امله تر اوسه ۱۴۲۳ مثبتې پېښې ثبت شوي، چې په دې لړ کې ۹۰ تنه وفات شوي او ۱۷۳ تنه نور بیا روغ شوي دي.