کاليفورنيا کې د ۱۲ کسانو وژونکی افغانستان کې جنګېدلی امریکايي پوځي و

آریانانیوز: د امريکا د سمندري ځواکونو پخواني افسر، چې تېره ورځ يې د کاليفورنيا د شرابو په يوه کلب کې لږ تر لږه دولس کسان ووژل، په افغانستان کې هم جګړې ته رالېږل شوی و.

په وژل شوو کسانو کې د امريکا د ځانګړو ځواکونو يو ډلګۍ مشر هلوس هم و.
د ايان ډيويډ لانګ په نوم دغه ۲۸ کلن افسر په امريکايي پوځ او افغانستان کې د جګړو له امله خپل ذهني توازن له لاسه ورکړی و او امریکايي رسنۍ وايي، چې له بريد وروسته يې ځان وژنه هم کړې ده.
د امريکا سمندري ځواکونو په دغه پېښه خواشيني ښکاره او د پېښې د قربانيانو له کورنيو سره يې خپله خواخوږي ښودلې ده.
سمندري ځواکونو ويلي، ايان ډيويډ لانګ له ۲۰۰۸ تر ۲۰۱۱ پوري په سمندري ځواکونو کې د نښه ويشتونکي په توګه دنده ترسره کړې او په خپلو کارونو کې يې څو ځله ميډالونه هم اخیستي.
د امريکا ميليټاري ټايمز ورځپاڼې ليکلي چې ايان لانګ له تېرې اوږدې مودې راهيسې د ذهني ناروغانو په لېست کې و، خو څه موده وړاندې يې نوم له دې ليسته ويستل شوی و او پوليس اوس هڅه کوي، چې د هغه د چال چلند په اړه د ايان لانګ له ګاونډيانو پوښتنې وکړي.
په تېر يوه کال کې دا دوهم ځل دی، چې د امريکايي پوځ غړي پر عامو خلکو له ډزو کولو وروسته ځانوژنه کوي. څو مياشتې وړاندې هم د هوايي ځواکونو يوه افسر ډيويډ کيلي د ټيکساس په يوه کليسا کې لږ تر لږه ۲۶ کسان وژلي وو.
د ۲۰۱۸ کال له پيله په امريکا کې په وسله ‌والو پېښو کې له دولس زرو زيات کسان وژل شوي او حکومت يې تر اوسه په مخنيوي نه دی توانېدلی.