په تحریک طالبان پاکستان کې د افغان اتباعو پر جذب بندیز ولګول شو

خبري سرچینو خبر ورکړی، چې تحریک طالبان د افغان اتباعو پر جذب د بندیز امر صادر کړی دی.

پاکستاني رسنیو اعلان کړی، چې تحریک طالبان پاکستان په دې ډله کې د افغان اتباعو پر ګمارلو بندیز لګولی دی.

تحریک طالبان پاکستان د دې ډلې ځان اعلان شویو قوماندانانو او واليانو ته امر کړی چې د افغان اتباعو له ګومارلو ډډه وکړي.

پاکستاني رسنیو اعلان وکړ چې د دغه هېواد د تحریک طالبان د ځان اعلان شوي مرستیال او دفاع وزیر مفتي مزاحم له خوا د خپرې شوې اعلامیې یوه کاپي دغو رسنیو ته رسېدلې ده.

په دغه حکم کې مفتي مظلوم د تحریک طالبان پاکستان “د شمالي او جنوبي سیمو پوځي کمیسیون” ته ویلي چې د افغان اتباعو له استخدام څخه دې ډډه وکړي.

د دغه حکم له مخې هر هغه څوک چې نافرماني وکړي مجازات کېږي.

خپلواکو سرچینو د ټي ټي پي په لیکو کې د افغان اتباعو شتون نه دی تایید کړی، خو پاکستاني چارواکو تل په دغه هېواد کې په ترهګریزو بریدونو کې د ځینو افغانانو د لاس لرلو په اړه اندېښنه ښودلې ده.

د طالبانو ویاند ذبیح الله مجاهد د پاکستاني چارواکو تورونه رد کړي او ویلي یې دي، چې تحریک طالبان پاکستان په دغه هېواد کې هېڅ اډه نه لري.