مجاهد: ډېر ژر به له افغانستانه د نه توکو کښت له منځه ولاړ شي

آریانانیوز: د طالبانو ویاند ویلي چې موږ به په افغانستان کې د نشه يي موادو د کښت او قاچاق پر وړاندې مبارزې ته دوام ورکړو.

د طالبانو ویاند ذبیح الله مجاهد اعلان کړی، چې د مخدره موادو له کښت، تولید او قاچاق سره مبارزه د افغان حکومت د جدي پلانونو په اجنډا کې ده.

مجاهد ویلي چې په افغانستان کې د مخدرو موادو ستونزه د حل په حال کې ده او سږ کال په ټول هېواد کې د کوکنارو کښت صفر ته نږدې شوی دی.

د طالبانو وياند له ګاونډيو هېوادونو هم وغوښتل چې د مخدره توکو پر وړاندې په مبارزه کې له طالبانو سره مرسته وکړي.

د طالبانو د ډلې مشر ملا هبت الله اخندزاده د تېر کال د زمري په میاشت کې یو حکم صادر کړ چې له مخې یې په هېواد کې د نشه يي توکو کښت، تولید، قاچاق او استعمال منع دی او له دې حکم څخه سرغړونکي به له شرعي چلند سره مخ شي.