ستانکزی: د نجونو د زده کړو ستونزه به حل کړو

د طالبانو د بهرنیو چارو وزارت سیاسي مرستیال وویل: د نجونو د ښوونځیو د بیا پرانیستلو په اړه ځینې اختلافات موجود دي.

د طالبانو د بهرنيو چارو وزارت سياسي مرستيال وويل: د نجونو د ښوونځيو د بيا پرانستلو په اړه ځينې اختلافات موجود دي، خو بالاخره به دغه ستونزه هواره شي.

شېرمحمد عباس ستانکزي د کابل ښار په دشت برچي سیمه کې د عاشورا په مراسمو کې وویل: ښوونځي به د ټولو افغانانو لپاره له تبعیض پرته پرانستل کېږي، چې د دوی شرعي او مسلم حق دی.

هغه زياته کړه: په ټولنه کې يو شمېر خلک د نجونو د ښوونځيو د بيا پرانستلو مخالف دي. د ظاهرشاه په وخت کې يې څلوېښت کاله هڅې وکړې، خو په ځينو ولايتونو کې د مخالفت له امله ونه توانېدل چې ښوونځي او پوهنتونونه جوړ کړي.

د طالبانو د بهرنیو چارو وزارت سیاسي مرستیال وویل: د علم او پوهې اهمیت باید په منطق او دلایل سره ټولو مخالفینو ته بیان شي او هیله لرم چې د نجونو د ښوونځیو ستونزه به ژر حل شي.

دا لومړی ځل نه دی چې د طالبانو د بهرنیو چارو مرستیال وزیر له شپږم ټولګي څخه د پورته نجونو د زده کړې په ملاتړ خبرې کوي.

ستانکزي په کابل کې د ۲۰۲۲ کال د ګرځندوی د نړیوالې ورځې په غونډه کې ویلی و، یو هېواد هغه مهال پرمختګ کولای شي، چې په هغه هېواد کې پوهنې وده وکړي.