د طالبانو لخوا د رسنیو ځپل؛ حکومت په افغانستان کې د آزادو معلوماتو جریان بندوي

طالبانو په خوست کې د درې محلي راډیوګانو د فعالیت بندولو او پر خبریالانو د پراخو محدودیتونو په لګولو سره د آزادو خبرونو د خپرېدو مخه نیولې ده. د افغانستان د خبریالانو مرکز د رسنیو د زیاتیدونکي ځپل او د هغې د منفي اغیزو په اړه اندیښنه ښودلې ده...

د تېرو دوو اونیو په ترڅ کې د طالبانو استخباراتو په خوست ولایت کې درې محلي راډیوګانې د فعالیت څخه منع کړې دي. دغه اداره ویلي چې د استخباراتو له همغږۍ پرته د مطالبو خپرول د دې راډیوګانو د بندېدو لامل شوی دی.

طالبانو پر افغان خبریالانو نوي محدودیتونه لګولي، چې په ټولنه کې د آزادو خبرونو د خپرېدو مخه نیسي. دغه محدودیتونه د خبریالانو د استخباراتو دفتر ته غوښتل او ګواښل هم شامل دي. خبریالانو ته ویل شوي چې پرته د معارف او استخباراتو له همغږۍ هیڅ ډول مواد په خپلو رسنیو کې مه خپروئ.

د طالبانو د مشر هبت الله اخندزاده د فرمان له مخې، په ننګرهار کې سیمه‌ییز چارواکي هم له رسنیو سره د عکس اخیستلو او مرکه کولو څخه منع شوي دي. دا اقدام د امر بالمعروف او نهي عن المنکر د قانون پر بنسټ شوی دی.

د افغانستان د خبریالانو مرکز د دغو محدودیتونو د پراخېدو او د هغې د رسنیو او د خلکو د معلوماتو ته د لاسرسي پر منفي اغیزو اندیښنه څرګنده کړې ده. دغه مرکز ویلي چې طالبانو د آزادو معلوماتو د جریان د مخنیوي لپاره هیڅ اقدام نه دی پرې ایښی او تر دې دمه لسګونه خبریالان له ځورونې، شکنجې او ګواښ سره مخ شوي دي.