د بشري حقونو د څار اداره: د نجونو د زده کړو ځنډول د ښځو له حقوقو ښکاره سرغړونه ده

آریانانیوز: د بشري حقونو د څار سازمان د طالبانو له خوا د نجونو د زده کړو ځنډول د شرم وړ بللي او ویلي یې دي چې دا پرېکړه د ښځو او نجونو له حقوقو څخه سرغړونه ده.

د طالبانو د لوړو زده کړو وزارت اعلان وکړ چې په پوهنتونونو کې د ښځو زده کړې تر بل خبرتیا پورې ځنډول شوې دي.

دغه وزارت په یوه مکتوب کې خصوصي او دولتي پوهنتونونو ته امر کړی چې د نجونو زده کړې وځنډوي.

په دغه لیک کې راغلي چې د ښځو د زده کړو د ځنډولو پرېکړه د طالبانو د کابینې د پرېکړې پر بنسټ شوې ده.

د طالبانو د لوړو زده کړو وزارت ویاند حافظ ضیاء الله هاشمي هم د دغه لیک تصدیق کړی دی
د بشري حقونو د څار ډلې په یوه ټوېټ کې ویلي، طالبان هره ورځ څرګندوي چې د افغانانو اساسي حقوقو ته په ځانګړې توګه د ښځو احترام نه کوي.

د نجونو د زده کړو د ځنډولو پرېکړې پراخ غبرګونونه راپارولي دي.

د طالبانو د المپیک کمېټې مشر نظرمحمد موحد ویلي، چې د نجونو د زده کړو د ځنډولو پرېکړه به د ولس او حکومت تر منځ د واټن لامل شي او بالاخره به دا پرېکړه په جګړه ختم شي. نوموړي په خپل ټويټ کې ليکلي، چې ولس جګړه ګټي.