کندهار کې پر عکاسۍ بندیز

کندهار کې د طالبانو والي د طالبانو په غونډو کې هر ډول عکاسۍ منع کړی دی.

په کندهار کې د طالبانو والي ملا محمد شیرین اخند د دې ډلې ملکي او نظامي ادارو ته یو لیک استولی او په خپلو رسمي او غیر رسمي غونډو کې یې د هر ډول فلم او عکس اخیستلو بندیز اعلان کړی دی.

په دغه مکتوب کې راغلي دي چې د دغې ډلې د رسمي او غیر رسمي غونډو راپورونه باید په لیکلي او غږیزو بڼه خپاره شي.

د دې لیک پر بنسټ، د ژوندیو مخلوقاتو انځورول په اسلام کې حرام دي.

تر دې وړاندې په فاریاب او جوزجان کې د طالبانو د امر بالمعروف او نهی عن المنکر د ریاست مامورین د واده په محافلو کې د عکاسۍ او فلم اخیستلو مخه نیولې وه.

په افغانستان کې د طالبانو له بیا راڅرګندېدو سره دغې ډلې د هېواد د وګړو پر ټولنیز ژوند ډېر محدودیتونه وضع کړي دي.

دا مهال په هېواد کې د ښوونځیو، پوهنتونونو، د ښکلا سالونونو او خصوصي او دولتي دفترونو دروازې د ښځو پر مخ تړلې دي.