چندرا آریا: طالبان باید په افغانستان کې د هزاره ګانو ساتنه وکړي

آریانانیوز: د کاناډا د پارلمان غړي چندرا آریا په کابل کې د کاج پر تعلیمي مرکز خونړي برید ته په اشارې سره د دغه هېواد له حکومته وغوښتل چې له طالبانو وغواړي چې په افغانستان کې د هزاره وو د خلکو ساتنه وکړي.

د کاناډا د پارلمان غړې چندرا آریا د بریتانیا د پارلمان د وروستي راپور په حواله ویلي چې په افغانستان کې هزاره توکم د نسل وژنې له جدي ګواښ سره مخ دي.

نوموړی د جمعې په ورځ د کاناډا پارلمان ته په وینا کې وویل چې په تېر کال کې د افغانستان هزاره وګړي په هدفي بریدونو کې وژل شوي دي.

آریا په خپله ټویټر پاڼه لیکلي چې په افغانستان کې هزاره ګان له تبعیض سره مخ شوي او د اقتصادي، ټولنیزو او بشري حقونو له کړکېچ څخه اغېزمن شوي دي.

د کاناډا د پارلمان دغه غړي وویل چې د طالبانو له واک ته رسېدو وروسته د هزاره ټولنې غړي په هدفي بریدونو کې وژل شوي او د کاناډا له حکومته یې غوښتي چې دغه بریدونه وغندي او له طالبانو یې وغواړي چې په افغانستان کې د هزاره وو د امنیت ساتنه وکړي.

د سنبلې په ۳۰مه د کابل په لوېدیځ کې د هزاره مېشتو په سیمه کې د کاج پر ښوونځي په برید کې ۶۰ زده کوونکي چې ډېری یې نجونې وې، ووژل شول او لسګونه نور ټپیان شول.