په هوايي بريدونو کې د ولسي وګړو تلفات ۵۲ سلنه زيات شوي

آریانانیوز: په افغانستان کې د ملګرو استازولي (یوناما) ويلي دي چې د تير کال په نسبت افغانستان کې د ملکي وګړو تلفات ۵۲ سلنه زیات شوي دي.

د يوناما په راپور کې ويل شوي دي چې د ۲۰۱۷ زيږديز کال په لومړيو شپږو مياشتو کې ۱۴۹ تنه ملکي وګړي په هوايي بريدونو کې وژل شوي او ۲۰۴ نور ټپيان وو، چې د ۲۰۱۸ په همدومره موده کې دغه مرګ ژوبله ۵۲ سلنه زياته شوې ده.
په راپور کې ويل شوي دي چې ددغو ملکي تلفاتو ۵۲ سلنه مسؤليت د افغان ځواکونو، ۴۵ سلنه د بهرنيو ځواکونو او درې فيصده يې د دولت پلوه ځواکونو له په غاړه دی.
راپور زیاتوي چې ددغه تلفاتو ډيره برخه يې ميرمنې او ماشومان دي.
يوناما په خپل راپور کې د جګړې په ښکېلو اړخونو غږ کړی دی چې په جګړو د ولسي خلکو د ژوند خونديتوب ته پام وکړي ترڅو د مرګ ژوبلې کچه نوره زياته نشي.
د يادونې وړ ده چې په دې وروستيو کې په هوايي بريدونو کې ګڼ شمير ملکي وګړي وژل شوي دي چې د ازادو سرچينو په وينا په تېره يوه اوونۍ کې په ننګرهار، لغمان، کاپيسا، ميدان وردګ او نورو ولايتونو کې له سلو زيات بې ګناه ولسي وګړي وژل شوي دي.