وروسته له هغې چې طالبانو د افغانستان کنټرول په لاس کې واخیست 153رسنۍ خپل فعالیتونه بندولو ته اړ ایستل شوي

آریانانیوز: د ژورنالیستانو نړیوال فدراسیون (IFJ) اعلان وکړ چې د طالبانو له خوا د هیواد تر کنټرول وروسته 153 افغان رسنۍ بندې شوي دي.

د ژورنالیستانو نړیوال فدراسیون په افغانستان کې د رسنیو د کارکونکو پر وړاندې د مخ په ډیریدونکي تاوتریخوالي په اړه اندیښنه څرګنده کړې او ویلي یې دي چې د طالبانو له خوا د افغانستان له نیولو راهیسې 153 رسنۍ خپل فعالیتونه بندولو ته اړ ایستل شوي دي.

د یاد فدراسیون هم په یوه راپور کې ویلي چې ،۷۰۰۰ د رسنیو کارکوونکي د طالبانو له خوا د افغانستان د نیولو له امله اغیزمن شوي دي.

راپور ټینګار کوي چې ښځینه خبریالانې هم د ډلې د واکمنۍ له امله له کار څخه بې برخې شوي دي.

د ژورنالیستانو نړیوال فدراسیون زیاته کړې چې د طالبانو له خوا د افغانستان له زندانونو څخه د شاوخوا 1000 مجرمینو خوشې کیدل د خبریالانو د خوندیتوب په اړه اندیښنې راپورته کړي دي. د دې دلیل د ژورنالیستانو لخوا په تیر حکومت کې د دې خلکو د توقیف پروسې پوښښ یادشوي.

دغه فدراسیون په افغانستان کې د خبریالانو د زیاتیدونکي توقیف ، د تجهیزاتو ضبط او د خبریالانو د شکنجې او ځورونې په اړه اندیښنه هم څرګنده کړې.

د ژورنالیستانو نړیوال فدراسیون ویلي چې په افغانستان کې له ۱۵۰ څخه زیاتو رسنیو کارکونکو ملګرو ملتونو ته یو پرانستي لیک استولي چې د ژورنالیستانو د ژغورلو لپاره د جدي اقداماتو غوښتنه کوي.