مجاهد: د نشه يي توکو د صادراتو پر وړاندې ولاړ یو

د طالبانو د ډلې ویاند وویل چې دغه ډله به اجازه ورنکړي چې افغانستان د مخدره موادو صادرونکی هیواد شي.

د طالبانو وياند ذبيح الله مجاهد وايي، چې له افغانستان څخه نورو هېوادونو ته د نشه يي موادو د قاچاق تورونه د دې ډلې پر ضد تبليغات دي.

د طالبانو ویاند ټینګار کړی چې په تېرو دوو کلونو کې په افغانستان کې د کوکنارو د کښت او قاچاق مخه تر ډېره حده نیول شوې ده.

مجاهد وویل: د قاچاق مخه نیول شوې او موږ به پرې نه ږدو چې افغانستان داسې هېواد شي چې نشه يي توکي ترې صادرېږي. له بده مرغه د دې پر ځای چې د نشه يي توکو پر وړاندې د مبارزې بهیر وهڅوي، تبلیغات کوي، چې سم کار نه دی.

د يادونې وړ ده، چې څه موده وړاندې د ډله ييزو امنيتي تړون د سازمان د عمومي منشي مرستيال والري سمريکوف ادعا کړې وه، چې نشه يي توکي له افغانستان څخه دغه تړون غړو هېوادونو ته راځي.