مجاهد: د داعش په اړه د امریکايي چارواکو څرګندونې حقیقت نه لري

آریانانیوز: د طالبانو ویاند ویلي چې په افغانستان کې د داعش د شمېر په اړه د امریکايي چارواکو څرګندونې حقیقت نه لري.

د طالبانو ویاند ذبیح الله مجاهد وايي، په افغانستان کې د داعش د شمېر په اړه د امریکايي چارواکو څرګندونې حقیقت نه لري او دا چې داعش له پخوا کم شوی او ځپل شوی دی.

مجاهد په خپله ټویټر پاڼه لیکلي: د دې مسلې راپورته کول او په دې برخه کې د امریکايي چارواکو مبالغه کول له داعش ډلې سره همکاري او د هغوی د ګټو لپاره کمپاین دی، چې باید ودرول شي.

تر دې مخکې د امریکا د متحدو ایالتونو د مرکزي ځواکونو “سنتکام” قوماندان مایکل کوریلا ویلي وو چې د داعش خراسان څانګه به په راتلونکو شپږو میاشتو کې د امریکا او لویدیځو هېوادونو پر ګټو د حملو توان پیدا کړي.