متقي: ایران ته سفر له لاسته راوړنو ډک و

د طالبانو د بهرنیو چارو وزارت سرپرست د طالبانو د رئیس الوزرا له سیاسي مرستیال سره وکتل او خبرې یې ورسره وکړې.

د طالبانو د بهرنیو چارو سرپرست وزیر امیرخان متقي د ریاست الوزرا له سیاسي مرستیال مولوي عبدالکبیر سره په لیدنه کې ایران ته سفر له لاسته راوړنو ډک بللی دی.

متقي ايران د افغانستان دوست هېواد وباله او زياته يې کړه، چې له ايراني چارواکو سره يې د دواړو هېوادونو ترمنځ د سياسي، اقتصادي او سوداګريزې پراختيا په اړه خبرې کړې دي.

مولوي عبدالکبیر په دې ناسته کې وویل، چې طالبان د سیمې له ټولو هېوادونو په ځانګړې توګه له ایران سره ښې اړیکې غواړي او دا اړیکې باید پراخې شي.