طالبان هڅه کوي چې د پاکستان او ټي ټي پي ډلې سره بیا خبرې وکړي

آریانانیوز: خبري سرچينو د پاکستاني طالبانو او د پاکستان د حکومت تر منځ د خبرو اترو لپاره د طالبانو د هڅو د پيل خبر ورکړی دی.

پاکستاني رسنیو خبر ورکړی دی په دې وروستیو کې د تحریک طالبان پاکستان (ټي ټي پي) مشر نورولي محسود احتمالا د افغان طالبانو په منځګړتوب د پاکستان او افغانستان د سرحدي سیمو له یوه پلاوي سره لیدلي دي.

دا غونډه د هغو هڅو یوه برخه ده چې د هغو خبرو اترو د بیا پیلولو احتمال وڅېړي چې د تېر کال په نومبر میاشت کې ځنډول شوي وو.

تر اوسه دواړو لورو په رسمي توګه دا موضوع نه ده تایید کړې.

تر دې مخکې پاکستاني چارواکو ویلي وو چې د سولې د خبرو د پیل لپاره د تحریک طالبان پاکستان تسلیمېدل یو له شرطونو څخه دی.

د مې په میاشت کې اسلام اباد ته د خپل سفر په ترڅ کې د طالبانو د بهرنیو چارو وزیر امیر خان متقي د دغه هېواد له انکار سره سره د پاکستان له تحریک طالبان سره د خبرو ملاتړ وکړ.