طالبان: د افغانستان په اړه د امریکا ادعاوې ردوو

د طالبانو ویاند د ترهګرو ډلو د کنټرولولو په برخه کې د طالبانو د ناتوانۍ یا نه لېوالتیا په اړه د یوه امریکايي قومندان څرګندونې رد کړې.

د طالبانو ویاند ذبیح الله مجاهد د امریکا په سنا مجلس کې د یوه امریکايي قومندان هغه څرګندونې رد کړې، چې ویلي یې وو، د ترهګرو ډلو په کنټرولولو کې د طالبانو ناتواني او یا نه لېوالتیا منځنۍ او جنوبي اسیا بې ثباته کوي.

هغه زیاته کړه چې طالبان د ترهګرو ډلو سره د مبارزې له نظره د تحریک طالبان پاکستان باندې د فشار راوړلو لپاره لږ لیوالتیا هم نه لري، په داسې حال کې چې ټي ټي پي د پاکستان د سرحدي سیمو لپاره یو جدي ګواښ دی.

د طالبانو ویاند دغه ډول څرګندونې د حقایقو او په افغانستان کې د روان وضعیت خلاف وبللې او زیاته یې کړه: موږ دا ډول ادعاوې ځکه ردوو چې افغانستان اوس امن دی او یو متحد حکومت د دغه هېواد ټوله جغرافیه تر خپل واک لاندې لري.

هغه زیاته کړه: هیڅ بهرنۍ ډلې ته اجازه نه ورکول کیږي چې د افغانستان په خاوره کې فعالیت وکړي او د طالبانو تګلاره او دریځ دا دی چې اجازه ورنکړي چې د افغانستان خاوره د نورو هیوادونو پر ضد وکارول شي.

ده څرګنده کړه: په داسې يوه حالت کې منفي او له حقيقته لرې څرګندونې د افغانستان له نیت، ارادې او له شته تګلارې سره په ټکر کې دي او موږ دا ډول ادعاوې په کلکه ردوو.