روسیه: موږ د کابل د سقوط وړاندوینه کړې وه

د افغانستان لپاره د روسیې ځانګړی استازی وايي، مسکو اته کاله مخکې د کابل د سقوط وړاندوینه کړې وه.

د افغانستان لپاره د روسیې ځانګړي استازي ضمیر کابلوف ویلي: مسکو اته کاله وړاندې پوهیده چې طالبان به په افغانستان کې حکومت په لاس کې واخلي.

هغه زیاته کړه: مخکې له دې چې طالبان په افغانستان کې واک ته ورسیږی، مسکو له هغوی سره ښې اړیکې درلودې.

کابلوف وویل: مسکو د طالبانو له چارواکو تمه لري چې د نړیوالې ترهګرۍ د مخنیوي لپاره لا زیاتې هڅې وکړي.

په افغانستان کې د روسیې ځانګړی استازی په دې باور دی چې طالب چارواکو د مخدره موادو د تولید د کمولو لپاره ډېر اقدامات کړي دي.