د کابل او اسلام‌آباد ترمنځ زیاتېدونکې ترینګلتیا؛ د تحریک طالبان پاکستان د اختلافاتو اصلي محور

د پاکستان د بهرنیو چارو وزارت ویاند ویلي چې د اسلام‌آباد او کابل ترمنځ د ترینګلتیا اصلي لامل په افغانستان کې د تحریک طالبان پاکستان (TTP) خوندي پټنځایونه دي.

د پاکستان دریځ د افغان طالبانو په اړه

د پاکستان د بهرنیو چارو وزارت ویاند، شفق علي خان، په خپل اوونیز خبري کنفرانس کې ټینګار کړی چې اسلام‌آباد دا موضوع څو ځله له طالبانو سره شریکه کړې او د دوه اړخیزو همکاریو د دوام لپاره باید دا ستونزه حل شي.

هغه زیاته کړه:

“تر هغه چې د تحریک طالبان پاکستان پټنځایونه په افغانستان کې له منځه لاړ نه شي، د دواړو هېوادونو ترمنځ همکاري ممکنه نه ده.”

د پاکستان لومړي وزیر، شهباز شریف، هم له طالبانو څخه غوښتي وو چې د ترهګرو ډلو د ملاتړ پر ځای، د تروریزم ضد جګړه کې له اسلام‌آباد سره همکاري وکړي.

د طالبانو غبرګون د پاکستان تورونو ته

د طالبانو حکومت دا تورونه رد کړي او ټینګار یې کړی چې پاکستان باید د خپلو امنیتي ستونزو پړه پر افغانستان وانه چوي.

طالبان ادعا کوي چې د پاکستان امنیتي بې‌ثباتي د دې هېواد د داخلي ستونزو پایله ده او افغانستان ته یې تړل ناسم دي.

د ملګرو ملتونو راپور د تحریک طالبان پاکستان په اړه

په همدې حال کې، د ملګرو ملتونو سازمان په خپل نوي راپور کې ویلي چې تحریک طالبان پاکستان په افغانستان کې پراخ حضور لري.

په پاکستان کې د تاوتریخوالي زیاتوالی

۲۰۲۴ کال تر اوسه د پاکستان د امنیتي ځواکونو لپاره په تېرو لسو کلونو کې تر ټولو خونړی کال ګڼل کېږي، چې دا وضعیت د کابل او اسلام‌آباد ترمنځ امنیتي ترینګلتیا نوره هم زیاته کړې ده.