د نړۍ د لوږې د بې ساري بحران په اړه د ملګرو ملتونو د سرمنشي اندیښنه

د ملګرو ملتونو سرمنشي په ۲۱مه پېړۍ کې پراخه لوږه او خوارځواکي د نه منلو وړ وبلله او ویې ویل: موږ په نړۍ کې د لوږې له بې ساري بحران سره مخ یو.

انتونیو ګوټریس وویل: موږ د لوږې له بې ساري نړیوال بحران سره مخ یو، او تر هغه چې اوکراین او روسیه د سوداګرۍ د بیا پیلولو لپاره لاره پیدا نه کړي، د کړکیچ لپاره به مؤثره حل لاره ونه موندل شي.

هغه وویل، موږ په نړیواله لوږه کې زیاتوالی لیدلی چې د لسیزو پرمختګونه یې شاته اړولي دي. په ایتوپیا، یمن، جنوبي سوډان، سومالیا او افغانستان کې ۷۵۰ زره کسان له لوږې او مرګ سره مخ دي.

د ملګرو ملتونو د سرمنشي په وینا ۲۰۲۱ کال کې د نړۍ په ۵۳ هېوادونو او سیمو کې ۱۹۳ میلیونه وګړي د خوړو له ناامنۍ سره مخ وو. د خوراکي توکو سخته ناامني خپل اوج ته رسېدلې ده.

هغه وویل، په 2022 کې د ډیری قحطۍ ریښتیني خطر شتون لري، او 2023 ممکن نور هم بدتر وي.