د طالبانو په زندانونو کې د جبري ودونو او زور زیاتي راپورونه

تازه راپورونه ښیي چې د طالبانو لخوا د افغان ښځو نیول زیات شوي، چې علتونه یې بېلابېل دي، لکه د محرم نه لرل، د زده‌کړې هڅه کول او نور بې‌اساسه تورونه.

په افغانستان کې د ښځو زندانیانو د اندېښنې وړ شمیر

که څه هم د زنداني ښځو کره شمېر نه دی معلوم، خو د طالبانو د زندانونو رئیس، د نړیوالو فشارونو له امله، منلې چې له ۱۸۰۰ څخه زیاتې ښځې دا مهال بندیانې دي.

له طالبانو زندانونو څخه د ښځو زړه بوږنونکې کیسې

ځینې خوشې شوې ښځې یا د دوی کورنۍ ادعا کوي چې طالبانو د زندانونو دننه له ځوانو ښځو څخه پراخ ناوړه استفاده کړې ده. د دوی په وینا، ځوانې نجونې د طالبانو له غړو سره جبري ودونو ته اړ ایستل کېږي او ورته ویل کېږي چې “په اسلامي امارت کې د دوی شرعي دنده د نکاح جهاد دی.”

سربېره پر دې، هغه ښځې چې مقاومت وکړي، له دروغجنو تورونو، ذهني او فزیکي شکنجو او حتی وهلو ټکولو سره مخ کېږي. راپورونه ښیي چې ځینې ښځې له زندانه تر خوشې کېدو وروسته د سختو ذهني شکنجو له امله ځان وژني. د بشري حقونو د یو شمېر سازمانونو د معلوماتو له مخې، تر اوسه له ۱۶۰ څخه ډېرې افغان ښځې د دې فشارونو له امله ځان وژنې ته مجبوره شوې دي.

د طالبانو غبرګون او خپلو جنګیالیو ته خبرداری

د افشا شویو معلوماتو له مخې، د طالبانو لخوا د ښځو ناوړه استفاده حتی د دوی د قضايي محاکمو د اندېښنې سبب شوې ده. د طالبانو مشر، شیخ هبت‌الله اخوندزاده، خپلو جنګیالیو ته امر کړی چې له څو ودونو ډډه وکړي او ویلي یې دي چې دا کړنې منفي پایلې لري.

پر طالبانو نړیوال فشارونه زیاتېږي

دا راپورونه په داسې حال کې خپرېږي چې نړیوال سازمانونه د افغانستان د بشري حقونو د وضعیت، په ځانګړې توګه د طالبانو تر واک لاندې د ښځو د شرایطو په اړه، اندېښنه ښیي. د طالبانو پر ضد د دیپلماتیکو فشارونو د زیاتوالي غوښتنې لا هم روانې دي.