د طالبانو د مشر نوی فرمان: د واک تمرکز او د ضبط شویو شتمنیو کندهار ته انتقال

د طالبانو مشر شیخ هبت‌الله اخندزاده په یو نوي فرمان کې حکم کړی چې ټول هغه اموال او شتمنۍ چې د طالبانو محلي ځواکونو لخوا ضبط شوي، باید مستقیماً کندهار ته انتقال شي. هیڅ قوماندان یا سیمه‌ییز چارواکی د دې شتمنیو د ساتلو حق نه لري.

د ځایي سرچینو د معلوماتو له مخې، د امارت اسلامي رهبري هڅه کوي چې د قدرت پر جوړښت او پریکړو زیات کنټرول ولري. دا نوی فرمان د هغه بهیر یوه برخه ده چې د طالبانو د واک ته رسېدو راهیسې روان دی، چې موخه یې د واک تمرکز د شیخ هبت‌الله او د کندهار مرکزي دفتر په لاس کې دی.

دا حکم نه یوازې د عامو خلکو ضبط شوې شتمنۍ رانغاړي، بلکې د محلي قوماندانانو او د ښاري حوزو د آمرینو یو شمېر صلاحیتونه هم د کندهار دفتر ته لېږدوي.

د طالبانو د مشر دوه اساسي پالیسۍ

د داخلي سرچینو په وینا، د طالبانو رهبري تر اوسه دوه اساسي موخو ته پاملرنه کړې:

1. پر ښځو پراخ محدودیتونه لګول او د هغوی د ټولنیز حضور کمول.

2. ټول صلاحیتونه او واک د طالبانو د مرکزي رهبري تر کنټرول لاندې راوستل.

په کندهار دفتر کې کار کوونکي اکثره د کوټې، بلوچستان د طالبانو غړي دي، چې ډېری یې د لوړو زده کړو له نعمت څخه بې برخې دي. دا مسئله د ځینو سیمه‌ییزو چارواکو او ان د طالبانو دننه د اندېښنو لامل شوې ده.

د دې پرېکړې پایلې: داخلي اختلافات که د واک پیاوړتیا؟

د طالبانو سیمه‌ییزو قوماندانانو ته د واک کمېدل ممکن په ولایتونو کې د نارضایتۍ لامل شي.

په کندهار کې د واک تمرکز، د طالبانو د مشر کنټرول قوي کوي، خو دا د طالبانو د مختلفو جناحونو ترمنځ اختلافات هم پیدا کولی شي.