بلخاب کې د جنګ ځپلو کډوالو په وړاندې د بامیانو د والي غیر انساني عمل

په بامیانو کې یوې سرچینې رسنیو ته ویلي چې په بامیانو کې د طالبانو والي عبدالله سرحدي د دغه ولایت د بلخاب له بې ځایه شویو سره د مرستو د رسولو مخه نیولې ده.

سرچينه زياتوي، چې شاوخوا يوه اونۍ وړاندې د بلخاب ولسوالۍ بېځايه شويو ته د مرستو د وېش پر سر د ده او د يکاولنګ د لومړۍ حوزې د ولسوال حاجي مختار احمدي ترمنځ جنجال شوی و.

د سرچينې د معلوماتو له مخې، د يکاولنګ په لومړۍ نمبر کې د طالبانو ولسوال د بلخاب له بېځايه شويو خلکو سره د مرستې پلوى دى، خو د طالبانو والي د دغه ډول عمل مخالف دى.

د سرچينې په وينا، عبدالله سرحدي هڅه کوي، چې مرستندويه موسسې د ګواښونو او رشوت له لارې دې ته اړ کړي، چې بې ځايه شويو ته مرستې ونه رسوي.

دا په داسې حال کې ده، چې په افغانستان کې د ملګرو ملتونو د مرستو د همغږۍ ادارې (OCHA) څو ورځې وړاندې یو راپور خپور کړ، چې په کې ویل شوي وو، چې د وروستیو جګړو له امله د بلخاب شاوخوا ۲۷ زره اوسېدونکي بې ځایه شوي دي.

دغه بنسټ زیاته کړه چې د دغو بې ځایه شویو له ډلې شاوخوا شپږ زره یې د بامیان ولایت یکاولنګ ۱ او یکاولنګ ۲ ولسوالیو ته بې ځایه شوي دي.

له بلې خوا د ملګرو ملتونو د ماشومانو د وجهي صندوق (یونیسف) یو چارواکی محمد ایویا وايي، چې له بلخاب څخه یو زیات شمېر بې ځایه شوي کسان په خرو باندې د یکاولنګ سیمې ته اوړي.

هغه په ​​خپل ټویټر اکاونټ کې د بلخاب د جګړې د کډوالو ځینې عکسونه خپاره کړي او ویلي یې دي چې د یونیسف مرستندویه ډلې باید څلور ساعته مزل وکړي چې دوی ته ورسیږي.

هغه زياته کړه، له بلخاب څخه بې ځايه شوي کسان چې ښځې او ماشومان هم په کې شامل دي، ليرې پرتې دي چې تګ راتګ یې ستونزمن دی او سړکونه نه لري.

بلخاب د طالبانو او مولوي مهدي د دې ډلې یو له ناراضه قوماندانانو څخه تر منځ د تاو تریخوالي له زیاتیدو وروسته، بلخاب د مولوي مهدي او طالبانو د ملاتړو ځواکونو تر منځ د سختو نښتو شاهد و.

د دغو جګړو په پایله کې یو شمېر ملکي وګړي وژل شوي او ټپیان شوي او سلګونه کورنۍ د جګړې له سیمو څخه غرونو او ګاونډیو ولایتونو ته کډه شوې دي.