په افغانستان کې د بیان آزادۍ بحران؛ په ۲۰۲۴ کال کې د محدودیتونو ۸ فیصده زیاتوالی

د AJSO سازمان په خپل ۲۰۲۴ راپور کې د افغانستان ښځینه خبریالانو پر وړاندې جدي چیلنجونه را منځته کړي دي. جنسیتي تبعیض، د حقیقت افشاکولو ویره، او د قانوني تضمینونو نشتوالی هغه اصلي موانع دي چې د دوی د معلوماتو ترلاسه کولو مخه نیسي. په همدې حال کې په افغانستان کې د رسنیو سرکوب په ۲۰۲۳ کال کې ۸ فیصده زیات شوی دی.

د AJSO د خبریالانو د ملاتړ سازمان وایي چې په ۲۰۲۴ کال کې ښځینه خبریالانو په افغانستان کې د معلوماتو ترلاسه کولو په برخه کې له ګڼو چیلنجونو سره مخ وې.

دغه سازمان په خپل ۲۰۲۴ راپور کې چې د سه شنبې په ورځ، د دسمبر په ۳۱ خپور شوی، ویلي چې د افغانستان اوسني امنیتي ادارې، په ځانګړې توګه د طالبانو د مشر دفتر، ښځینه خبریالانو ته معلومات نه ورکوي، پداسې حال کې چې تحلیلګرانو او روغتیایي کارمندانو ته په نسبي توګه په اسانۍ سره معلومات ورکول کېږي.

د دغه سازمان د موندنو له مخې، ښځینه خبریالانو جنسیتي تبعیض (۳۸%) او د حقیقت افشاکولو ویره (۳۳%) د هغو عمده عواملو په توګه یاد کړي چې د طالبانو حکومت یې له معلوماتو سره شریکولو څخه مخنیوی کوي.

په راپور کې همدارنګه ویل شوي چې د ځواب ویونکو درېیمه برخه د قانوني تضمینونو نشتوالی یاد کړی او ویلي یې دي چې دوی په یو غیرفعاله سیسټم کې خوندي نه دي.

د خبریالانو د ملاتړ سازمان ټینګار کړی چې په افغانستان کې، په ځانګړې توګه د ښځینه خبریالانو لپاره د بیان آزادۍ د ملاتړ او دفاع اړتیا تر هر وخت زیات اړینه ده.

دغه راپور په داسې وخت کې خپور شوی چې مخکې له دې، د افغانستان د خبریالانو مرکز په خپل وروستي راپور کې چې د دسمبر په ۲۶ خپور شوی و، ویلي و چې په افغانستان کې د رسنیو سرکوب په ۲۰۲۳ کال کې ۸ فیصده زیات شوی دی.

د افغانستان د خبریالانو مرکز په راپور کې د طالبانو د محدودیتونو له امله د رسنیو د فعالیتونو د درېولس وقفو او د دې ډلې لخوا د خبریالانو د څو ځله نیولو یادونه شوې ده.