‌‌حامد کرزي په افغانستان کې د نجونو د ښوونځیو د بیا پرانیستلو غوښتنه وکړه

حامد کرزي یو ځل بیا د نجونو لپاره د ښوونځیو او پوهنتونونو د پرانیستلو غوښتنه وکړه.

حامد کرزي د افغانستان د خپلواکۍ د کلیزې په مناسبت په یوه پیغام کې له طالبانو وغوښتل چې په ښوونځیو او پوهنتونونو کې د افغان نجونو او ښځو د زده کړې لپاره شرایط برابر کړي.

په دغه پیغام کې حامد کرزي په دې باندې په ټینګار سره چې د دغه هېواد روښانه راتلونکې د ځوان نسل په زده کړه کې نغښتې ده، څرګنده کړه: په دې ویاړمنه موقع او د یوه رښتیني خپلواک او پر ځان بسیا افغانستان لپاره یو ځل بیا د افغانستان له سرپرست حکومت څخه غوښتنه کوم. د ښوونځيو او پوهنتونونو دروازې دې ژر تر ژره د هېواد د نجونو پر مخ پرانېزي، تر څو هغه نجونې چې د علم او پوهې په زیور سمبالې وي، د هېواد په پرمختګ او د نورو له اړتیا څخه په خلاصون کې خپله ونډه ولوبوي.

د افغانستان پخواني جمهور رئیس وویل: د تاریخ په اوږدو کې د افغانستان خلکو په پوره اتفاق او اتحاد سره د خپل هېواد د ساتنې لپاره لاسونه سره یو کړل او اوس باید هر څوک له فقر څخه د خلاصون، د پوهې د ترلاسه کولو او پرمختګ لپاره اوږه په اوږه کار وکړي.

کرزي ويلي دي چې خپلواکي يو ستر وياړ دی او بايد دا وياړ وساتل شي او يوازې د نورو له اړتيا څخه په خلاصون او پرمختګ سره يې ساتنه ممکنه ده.

اوس چې د نجونو د ښوونځیو له تړل کېدو څه باندې زر ورځې تېرې شوې او د پوهنتونونو له تړل کېدو څه باندې ۵۰۰ ورځې تېرې شوې، خو طالبان لا هم په دې برخه کې کوم څرګند دریځ نه لري.