گوانتاناموبے جیل سے آخری طالبان قیدی رہا ہو گیا

آریانانیوز: طالبان کے بانی کے قریبی ساتھیوں میں سے ایک اور گوانتاناموبے جیل کے آخری افغان قیدی حاجی بشیر نورزئی رہائی کے بعد کابل پہنچ گئے۔

طالبان کے بانی اور سابق سربراہ ملا محمد عمر کے ایک قریبی ساتھی اور اس گروپ کو مالی معاونت فراہم کرنے والوں میں سے ایک حاجی بشیر نورزئی گوانتاناموبے جیل سے رہائی کے بعد کابل واپس آئے۔

نورزئی جو کہ گوانتاناموبے جیل میں آخری افغان قیدی تھے، کو امریکی پولیس نے 2005 میں نیویارک سے منشیات کی اسمگلنگ کے الزام میں گرفتار کیا تھا اور عمر قید کی سزا سنائی تھی۔

طالبان کے قریبی ذرائع کا کہنا ہے کہ طالبان نے نورزئی کو ایک امریکی شہری کی رہائی کے بدلے جیل سے رہا کیا ہے تاہم انہوں نے امریکی شہری کی شناخت کے بارے میں کچھ نہیں بتایا۔

طالبان نے باضابطہ طور پر اس معاملے کی تصدیق نہیں کی ہے تاہم امریکی حکومت نے متعدد بار طالبان سے امریکی سابق فوجی مارک فریرچس کی رہائی کا مطالبہ کیا تھا۔

واضح رہے کہ حاجی بشیر نورزئی جنوبی افغانستان کے سب سے بڑے منی چینجرز میں سے ایک تھے جنہوں نے طالبان کے دور میں کرنسی کے تبادلے اور ترسیلات زر کے لیے ایک بڑا نیٹ ورک بنایا ہوا تھا۔

اسی طرح نوروزئی ان سابق جہادی کمانڈروں میں سے ایک تھے جو طالبان کے سربراہ اور بانی ملا محمد عمر کے ساتھ قریبی رابطوں کی وجہ سے مشہور ہوئے اور افغانستان میں ان کی حکومت کے دوران انہیں طالبان کو مالی معاونت فراہم کرنے والوں میں سے ایک سمجھا جاتا تھا۔