مسجد اقصیٰ اور تمام فلسطینی سرزمین فلسطینیوں کا حق ہے، طالبان

طالبان نے مسجد اقصیٰ کے اندر یہودی عبادت گاہ کی تعمیر کے بارے میں صیہونی حکومت کے حکام کے بیانات کی مذمت کی ہے۔

طالبان کی زیر قیادت حکومت نے مسجد اقصیٰ کے اندر یہودی عبادت گاہ کی تعمیر کے حوالے سے صیہونی حکومت کے حکام کے بیانات کی سخت الفاظ میں مذمت کی ہے۔

طالبان کے بیان میں کہا گیا ہے کہ ان بیانات سے ظاہر ہوتا ہے کہ صیہونی حکومت نہ صرف کسی تقدس، قوانین اور بین الاقوامی اصولوں کا احترام نہیں کرتی بلکہ ان تمام اصولوں، قوانین اور اقدار کی بلا امتیاز خلاف ورزی بھی کرتی ہے اور قبلہ اول اور مسلمانوں کی مقدس مسجد کے بارے میں اس طرح کے غاصبانہ بیانات سے دنیا کے تمام مسلمانوں کے جذبات بھڑک اٹھتے ہیں۔
بیان میں مزید کہا گیا ہے کہ طالبان مسجد اقصیٰ اور تمام فلسطینی علاقوں کو فلسطینیوں کا حق سمجھتے ہیں اور مسجد اقصیٰ کو مسلمانوں کا قبلہ اول تسلیم کرتے ہیں۔ غاصب صیہونی حکومت کی طرف سے القدس الشریف پر کوئی بھی قبضہ غیر قانونی اور تسلیم شدہ حقائق کے منافی ہے۔

ہم ایک بار پھر عالم اسلام اور بین الاقوامی ممالک اور تنظیموں کے حکمرانوں سے مطالبہ کرتے ہیں کہ وہ صیہونی حکومت کی غیر قانونی اور وحشیانہ جارحیت کے خلاف اٹھ کھڑے ہوں اور غزہ میں نسل کشی اور انسانی جرائم کو روکیں اور غاصب اسرائیلی حکام کو اس طرح کے غیر ذمہ دارانہ بیانات دینے سے روکیں۔