طالبان: جوانان به جای مهاجرت به افغانستان خدمت کنند

آریانا نیوز: ندامحمد ندیم، سرپرست وزارت تحصیلات عالی طالبان، در مراسم فراغت پوهنتون پلی‌تخنیک کابل، از مهاجرت جوانان ابراز نگرانی کرد و گفت که مهاجرت باعث بدنامی افغانستان است. او از جوانان خواست که به جای مهاجرت، به فکر خدمت به کشور باشند، زیرا افغانستان به توانایی جوانان خود نیاز دارد…

سرپرست وزارت تحصیلات عالی گروه طالبان از فرار جوانان از کشور ابراز نگرانی کرده و خطاب به جوانان بیکار می‌گوید خیر شما در این نیست که از کشور فرار کنید.

به گزارش خبرگزاری جمهور، ندامحمد ندیم، سرپرست وزارت تحصیلات عالی گروه طالبان، در مراسم فراغت محصلین پوهنتون پلی‌تخنیک کابل گفته که مهاجرت جوانان عاملی برای بدنامی افغانستان است و جوانان به جای مهاجرت، به فکر خدمت به افغانستان باشند.

او خطاب به جوانان گفته که خیر شما در این نیست که از وطن بیرون شوید و در کشورهای دیگر تاکسی‌رانی یا مزدوری کنید. افغانستان به توانایی جوانان خود نیاز دارد.

ندامحمد ندیم افزوده که این کشور به امیر، خطیب، عالم دین، داکتر و انجنیر ضرورت دارد و هرکسی که توانایی کار دارد فردا برایش کار پیدا می‌شود.

گفتنی است که با تسلیم دادن افغانستان به گروه طالبان، میزان فقر و بیکاری در کشور بیداد می‌کند و جوانان در حال فرار از کشور هستند.