تاکید شورای مهاجرت ناروی بر افزایش کمک‌های جهانی به باشنده گان افغانستان

آریانا نیوز: به گفته رییس شورای مهاجرت ناروی می‌گوید، باشنده گان افغانستان بیش از هر زمان دیگر به کمک‌های جامعه بین‌المللی نیاز دارند…

یان ایگلند، رییس شورای مهاجرت ناروی می‌گوید که کمک‌های اضطراری به تنهایی مشکل افغانستان را حل نمی‌کند و باید کمک‌ها در بخش توسعه این کشور نیز صورت گیرد.

یان ایگلند روز گذشته در چند پیام در شبکه ایکس نوشته است که در حال حاضر مردم افغانستان بیشتر از هر زمان دیگر به کمک‌های جامعه بین‌المللی نیاز دارند.

ایگلند همچنان گفته است که کارمندان شورای مهاجرت ناروی، به شمول زنان توانسته اند که کمک‌های اضطراری را به صورت مستقیم به زنان و مردان در افغانستان برسانند.

رییس شورای مهاجرت ناروی همچنان گفته که مسوولان ارشد نهادهای کمک‌رسانی در حالی نشستی را دیروز در مورد افغانستان برگزار کردند که وضعیت بشری در این کشور به شدت نگران کننده شده است.